విరోష్ ఆస్తుల విలువ తెలిస్తే షాకే.. ఏకంగా రూ.120 కోట్ల పైమాటే.. ఫిబ్రవరి 26న ఒక్కటవ్వబోతున్న జంట..

టాలీవుడ్ బ్యూటీ Rashmika Mandanna త్వరలోనే స్టార్ హీరో Vijay Deverakonda తో కొత్త జీవితం ప్రారంభించబోతున్నారు.ఈ నెల 26న ఇద్దరూ వివాహ బంధంలోకి అడుగుపెట్టనున్నారు. ఈ మేరకు వారిద్దరూ తమ ప్రేమను అధికారికంగా ప్రకటించారు. ఈ వివాహం అనంతరం మార్చి 4న హైదరాబాద్‌లో అంగరంగ వైభవంగా గ్రాండ్ రిసెప్షన్ నిర్వహించనున్నట్లు తెలిపారు. ఈ వేడుకకు దేశవ్యాప్తంగా సినీ, రాజకీయ, వ్యాపార రంగాలకు చెందిన ప్రముఖులు హాజరుకానున్నారని తెలుస్తోంది. 2026లో జరగనున్న అత్యంత ప్రతిష్టాత్మక సెలబ్రిటీ వివాహాల్లో ఇది ఒకటిగా నిలవనుందని అభిమానులు భావిస్తున్నారు.

ఈ జంట సోషల్ మీడియా వేదికగా తమ పెళ్లి విషయాన్ని ప్రకటిస్తూ అభిమానులకు సర్‌ప్రైజ్ ఇచ్చారు. ఇన్‌స్టాగ్రామ్ ద్వారా స్పందించిన Vijay Deverakonda, తమ వివాహ వేడుకకు "వెడ్డింగ్ ఆఫ్ విరోష్" అనే పేరు పెట్టినట్లు తెలిపారు. అభిమానులు ప్రేమగా తమ జంటను "విరోష్" అని పిలుస్తుండటంతో.. అదే పేరును పెళ్లి వేడుకకు పెట్టినట్లు వెల్లడించారు.ఇదే సందర్భంగా పెళ్లి ఆహ్వాన పత్రాన్ని కూడా అధికారికంగా షేర్ చేస్తూ.. ఈ సంతోషకరమైన క్షణాన్ని అభిమానులతో పంచుకున్నారు.

విజయ్ దేవరకొండ, రష్మిక మందన్న జంట తొలిసారి గీత గోవిందం సినిమాలో కలిసి నటించారు. ఆ సినిమా ఘన విజయం సాధించడమే కాకుండా, ఈ జంటకు ప్రత్యేకమైన అభిమాన వర్గాన్ని కూడా ఏర్పరిచింది. ఆ తర్వాత డియర్ కామ్రేడ్ సినిమాలో మరోసారి కలిసి నటించి తమ నటనతో ప్రేక్షకులను ఆకట్టుకున్నారు.

ఈ సినిమాల సమయంలోనే వీరి మధ్య స్నేహం ప్రేమగా మారిందనే వార్తలు వినిపించాయి. ప్రారంభంలో ఈ విషయంపై ఇద్దరూ మౌనంగా ఉన్నప్పటికీ, కాలక్రమేణా తమ సంబంధాన్ని బహిరంగంగానే అంగీకరించినట్లు కథనాలు వచ్చాయి.తాజా ప్రకటనతో మొత్తం క్లారిటీ వచ్చేసింది.

రష్మిక మందన్న కెరీర్ విషయానికి వస్తే.. ఆమె కన్నడ సినిమా కిరిక్ పార్టీతో నటిగా అరంగేట్రం చేసింది. కర్ణాటకలోని కొడగు జిల్లా నుంచి వచ్చిన ఈ భామ.. తక్కువ కాలంలోనే కన్నడ నుంచి తెలుగు, తమిళం, ఆపై బాలీవుడ్ వరకు తన ప్రతిభను చాటింది. తెలుగులో స్టార్ హీరోయిన్‌గా గుర్తింపు తెచ్చుకున్న రష్మిక, ప్రస్తుతం బాలీవుడ్‌లోనూ వరుస అవకాశాలతో బిజీగా ఉంది. సినిమాలతో పాటు ప్రముఖ బ్రాండ్ల ప్రకటనల ద్వారా కూడా భారీగా ఆదాయం సంపాదిస్తోంది.

నివేదికల ప్రకారం.. ఆమె ఒక్కో సినిమాకు సుమారు రూ.5 కోట్ల వరకు రెమ్యునరేషన్ తీసుకుంటోంది. ఫైనాన్షియల్ ఎక్స్‌ప్రెస్ అంచనాల ప్రకారం.. రష్మిక నికర ఆస్తుల విలువ దాదాపు రూ.66 కోట్ల వరకు ఉంది. ఆమె బెంగళూరులో రూ.8 కోట్ల విలువైన భవనం కలిగి ఉండగా.. ముంబై, గోవా, కూర్గ్, హైదరాబాద్‌లలో కూడా ఆస్తుల్లో పెట్టుబడి పెట్టినట్లు సమాచారం. కార్ల విషయానికొస్తే, ఆమె వద్ద ఆడి క్యూ3, రేంజ్ రోవర్ స్పోర్ట్, టయోటా ఇన్నోవా, హ్యుందాయ్ క్రెటా, మెర్సిడెస్-బెంజ్ సి-క్లాస్ వంటి ఖరీదైన వాహనాలు ఉన్నాయి.

ఇక విజయ్ దేవరకొండ విషయానికి వస్తే.. అర్జున్ రెడ్డి సినిమాతో ఆయనకు దేశవ్యాప్తంగా విపరీతమైన క్రేజ్ వచ్చింది. ఆ సినిమా తర్వాత ఆయన నటించిన అనేక చిత్రాలు బ్లాక్‌బస్టర్ హిట్స్‌గా నిలిచాయి. విజయ్ తన స్టైల్, డైలాగ్ డెలివరీ, యాటిట్యూడ్‌తో యువతకు ఐకాన్‌గా మారాడు. ఆయన ఒక్కో సినిమాకు సుమారు రూ.12 నుంచి రూ.15 కోట్ల వరకు పారితోషికం తీసుకుంటున్నట్లు సమాచారం. హైదరాబాద్ ఫిల్మ్ నగర్‌లో రూ.15 కోట్ల విలువైన లగ్జరీ బంగ్లా ఆయన సొంతం.

కార్లంటే ప్రత్యేక ఇష్టమున్న విజయ్ వద్ద BMW 5 సిరీస్, ఫోర్డ్ ముస్తాంగ్, వోల్వో XC90, రేంజ్ రోవర్ వంటి ఖరీదైన కార్లు ఉన్నాయి. అంతేకాదు, ఆయనకు సొంతంగా ఒక చిత్ర నిర్మాణ సంస్థ కూడా ఉంది. నివేదికల ప్రకారం.. విజయ్ దేవరకొండ నికర ఆస్తుల విలువ రూ.60 నుంచి రూ.70 కోట్ల మధ్య ఉంటుందని అంచనా.