గ్యాస్ సిలిండర్ తాజా ధరలు ఇలా.. కోల్‌కతాలో అతిస్వల్ప పెరుగుదల

ఆగస్ట్ నెలలో నాన్ సబ్సిడీ ఎల్పీజీ సిలిండర్ (లిక్విపైడ్ పెట్రోలియం) గ్యాస్ ధరలు ఆగస్ట్ 1వ తేదీ నుండి మెట్రో నగరాల్లో మారలేదు. కేవలం కోల్‌కతాలో మాత్రమే రిటైల్ సిలిండర్ ధరలు 50 పైసలు పెరిగాయి. ఎల్పీజీ సిలిండర్ ధరలను ప్రతి నెల మొదటి తేదీన సమీక్షిస్తారనే విషయం తెలిసిందే. అంతర్జాతీయ ఇంధన రేట్లు, అమెరికా డాలర్, రూపాయి మారకం విలువపై కూడా ఆధారపడి ఉంటాయి.

గత నెలలో ఎల్పీజీ గ్యాస్ సిలిండర్ ధర ఢిల్లీలో ఒక రూపాయి, ముంబైలో మూడున్నర రూపాయలు పెరిగింది. ఫిబ్రవరిలో ఎల్పీజీ గ్యాస్ సిలిండర్ ధర రూ.858 పెరిగింది. మార్చిలో గ్లోబల్ ఆయిల్ మార్కెట్ పైన కరోనా ప్రభావం పడిన నేపథ్యంలో ధర రూ.805కు తగ్గింది. మే నెలలో ధరలు మరింత తగ్గిపోవడంతో గ్యాస్ ధరలు రూ.581కు తగ్గింది.

సబ్సిడీ లేని 14.2 కిలోల ఎల్పీజీ సిలిండర్ ధరలు ఢిల్లీలో రూ.594, కోల్‌కతాలో రూ.621, ముంబైలో రూ.594, చెన్నైలో రూ.610.50గా ఉంది. వినియోగదారులంతా మార్కెట్ ధరకే ఎల్పీజీ సిలిండర్లను కొనుగోలు చేయాలి. ప్రభుత్వం సబ్సిడీని నేరుగా అర్హత ఉన్నవారి బ్యాంకు ఖాతాల్లోకి బదలీ చేస్తుంది. అర్హులకు ఏడాదికి 12 సిలిండర్లు సబ్సిడీపై అందిస్తుంది.