భారీగా తగ్గిన గ్యాస్ సిలిండర్ ధరలు, హైదరాబాద్ సహా వివిధ నగరాల్లో ఎంతంటే?

కరోనా వైరస్ వ్యాప్తీని నిరోధించేందుకు దేశవ్యాప్తంగా లాక్ డౌన్ కొనసాగుతోంది. ఈ సమయంలో నెలలో రెండుసార్లు ఎల్పీజీ గ్యాస్ సిలిండర ధరలు తగ్గాయి. గత కొద్ది నెలలుగా ప్రపంచవ్యాప్తంగా క్రూడాయిల్ ధరలు భారీగా పడిపోయాయి. కరోనా దెబ్బతో పాటు రష్యా-సౌదీ ధరల పోరు దీనికి కారణం. గత కొద్ది వారాలుగా అంతర్జాతీయ మార్కెట్లో ధరలు పడిపోతున్నాయి.

రూ.60 నుండి రూ.65 తగ్గుదల

అన్ని పెద్ద నగరాల్లో 14.2 కిలోల ఎల్పీజీ సిలిండర్ ధర రూ.60 నుండి రూ.65 మధ్య తగ్గింది. ఈ ధరలు ఏప్రిల్ 1వ తేదీ నుండి అమలులోకి వస్తాయి. ఈ మేరకు ఇండియన్ ఆయిల్ కార్పోరేషన్ (IOC) ఆయా నగరాల్లోని ధరలను విడుదల చేసింది.

ఢిల్లీ, హైదరాబాద్ నగరాల్లో ధరలు..

దీంతో 14.2 కిలోల సిలిండర్ ధర ఢిల్లీలో రూ.61.5 తగ్గి రూ.805.50 నుండి రూ.744కు తగ్గింది. కోల్‌కతాలో రూ.839.5 నుండి 774.5కు తగ్గింది. చెన్నైలో రూ.826 నుండి రూ.761.5, ముంబైలో రూ.776.5 నుండి రూ.714.5 తగ్గింది. కోల్‌కతాలో రూ.65 తగ్గగా, చెన్నైలో రూ.64.50, ముంబైలో రూ.62 తగ్గింది. హైదరాబాద్‌లో రూ.917 నుండి రూ.862కు తగ్గింది.

19 కిలోల సిలిండర్ ధర

19 కిలోల సిలిండర్ ధరలు ఢిల్లీలో రూ.1,348.50 నుండి రూ.1,285.50కు తగ్గింది. కోల్‌కతాలో రూ.1,234కు, ముంబైలో రూ.1,402కు తగ్గింది. గత రెండు నెలల్లో సిలిండర్ ధరలు తగ్గుతున్నాయి. ప్రతి ఇంటికి సబ్సిడీ మీద ఏడాదికి గరిష్టంగా 12 సిలిండర్లు అందిస్తుంది కేంద్ర ప్రభుత్వం.