9 శాతం వడ్డీకే క్రెడిట్ కార్డు క్యాష్: కస్టమర్లకు తక్కువ, వారికి మాత్రం ఎక్కువ వడ్డీ

ముంబై: ఎంపిక చేసిన కొంతమంది వినియోగదారులకు IDFC ఫస్ట్ బ్యాంకు క్రెడిట్ కార్డు మీద నగదు ఉపసంహరణ వడ్డీ రేట్లను 9 శాతం ఇవ్వాలని యోచిస్తోంది. క్రెడిట్ కార్డుల నుండి నగదు ఉపసంహరణపై అధిక వడ్డీలను వసూలు చేసే అంశానికి సంబంధించి దూరంగా ఉండాలని IDFC ఫస్ట్ బ్యాంకు భావిస్తోంది. మంచి క్రెడిట్ రిపోర్ట్ ఉన్న కస్టమర్లకు ఇప్పటి నుండి కార్డు నగదు ఉపసంహరణపై తక్కువ వడ్డీ రేటు చెల్లించే అవకాశం ఉంది.

భిన్నంగా ముందుకు

IDFC ఫస్ట్ బ్యాంకు క్రెడిట్ కార్డు బిజినెస్‌ను ప్రారంభించింది. ఈ నేపథ్యంలో కస్టమర్లపై వడ్డీ రేటును తొమ్మిది శాతం కంటే తక్కువ వసూలు చేయాలని భావిస్తోంది. అయితే ఇది కస్టమర్ క్రెడిట్ ప్రొఫైల్‌ను బట్టి, వార్షిక శాత వడ్డీ రేటు మారుతుంది. ఇది 36 శాతం వరకు ఉంటుంది. ఇప్పటికే క్రెడిట్ కార్డు మార్కెట్లో పలు సంస్థలు ఉన్నాయి. IDFC ఫస్ట్ బ్యాంకు ఆలస్యంగా ప్రవేశించింది. దీంతో బిన్నగా ముందుకు వెళ్లాలని యోచిస్తోంది.

కస్టమర్లకు... ఇతరులకు

కస్టమర్ ప్రొఫైల్‌ను అంచనా వేసేందుకు, స్కోర్ ఆదారంగా వడ్డీ రేట్లను అందించేందుకు బ్యాంకు యాజమాన్యం స్కోరింగ్ విధానం రూపొందించింది. ఈ స్కోర్ ఆధారంగా వడ్డీ రేటు ఉంటుంది. ఈ బ్యాంకు ప్రారంభంలో తమ కస్టమర్లకు ఈ క్రెడిట్ కార్డ్స్ అందిస్తుంది. వచ్చే రెండు నెలల్లో కస్టమర్ల నుండి దరఖాస్తులు స్వీకరిస్తుంది. ఏప్రిల్ నుండి బ్యాంకేతర కస్టమర్లు కూడా దరఖాస్తు చేసుకోవచ్చు.

వారికి ఎక్కువ

పలు బ్యాంకులు నగదు ఉపసంహరణపై మొదటి రోజు నుండే వడ్డీ రేట్లు, ఛార్జీలు వసూలు చేస్తాయి. IDFC ఫస్ట్ బ్యాంకు మాత్రం తొలుత రూ.250 ఫ్లాట్ ఫీజు వసూలు చేస్తుంది. నగదు ఉపసంహరణపై 48 రోజుల వడ్డీ లేని వ్యవధి అందిస్తోంది. తొమ్మిది శాతం వార్షిక వడ్డీ చాలా వరకు IDFC ఫస్ట్ బ్యాంకు ప్రస్తుతం కస్టమర్ కోసం ఉంది. బ్యాంకు కస్టమర్లు కాని వారికి మాత్రం వడ్డీ రేటు కాస్త ఎక్కువ.