మోడీ ప్రభుత్వం టార్గెట్, ఐపీవో ద్వారా ఎల్ఐసీకి ఎంత? డిపాజిట్ నుండి మినహాయింపు!!

లైఫ్ ఇన్సురెన్స్ కార్పోరేషన్ ఆఫ్ ఇండియా(LIC) ఐపీవో ద్వారా రూ.65,400 కోట్లు (8.7 బిలియన్ డాలర్లు) సమీకరించాలని భావిస్తోందట. ఎల్ఐసీ ఒక్కో షేర్ ధర రూ.2000 నుండి రూ.2100 వరకు ఉండవచ్చు. కొంతమంది రిటైల్ ఇన్వెస్టర్లకు డిస్కౌంట్ ఉండనుంది. ఎల్ఐసీ పాలసీదారులకు 10 శాతం డిస్కౌంట్ ఉంటుంది. ఎల్ఐసీ ఐపీవో మార్చి 10వ తేదీ నుండి 14వ తేదీ మధ్య ఉండవచ్చునని తెలుస్తోంది. ఇప్పటికే ఎల్ఐసీ ఐపీవోకు సంబంధించి రోడ్ షో ప్రారంభమైంది.

నిధుల సమీకరణ

ప్రస్తుత ఆర్థిక సంవత్సరం (2021-22)లో అసెట్ సేల్ టార్గెట్ అందుకోవడానికి మోడీ ప్రభుత్వానికి రూ.63,000 కోట్లు అవసరం. దేశంలో అతిపెద్ద ఐపీవో ఇది కాబోతుంది. ఎల్ఐసీ 16,940 కోట్ల షేర్లను యాంకర్ ఇన్వెస్టర్లకు మార్చి 9న అలాట్ చేసే అవకాశాలు ఉన్నాయి. స్టాక్ మార్కెట్ నియంత్రణ సంస్థ సెబి వద్ద ఎల్ఐసీ ఈ నెల 13వ తేదీన డ్రాఫ్ట్‌ను దాఖలు చేసింది. దీని ప్రకారం రూ.65,000 కోట్లకు పైగా సేకరించాలని లక్ష్యంగా పెట్టుకుంది. వచ్చే నెలలో స్టాక్ మార్కెట్లను తాకే ఎల్ఐసీ ఐపీవోలో ఉద్యోగులు, పాలసీదారులు రాయితీపై షేర్ల కోసం బిడ్స్ దాఖలు చేయవలసి ఉంటుంది.

5 శాతమే

ఎల్ఐసీలో ప్రభుత్వానికి వంద శాతం వాటా ఉంది. ఐపీవో ద్వారా కేవలం 5 శాతం మాత్రమే విక్రయిస్తుంది. కంపెనీ ఎంబెడెడ్ వ్యాల్యూ అంటే కంపెనీ ఆస్తుల నికర వ్యాల్యూ, భవిష్యత్తు లాభాల ప్రస్తుత వ్యాల్యూ ప్రకారం రూ.5.4 లక్షల కోట్లుగా నిర్ధారించినట్లు డీఆర్‌హెచ్‌పీలో ప్రభుత్వం తెలిపింది. బమా కంపెనీల మార్కెట్ వ్యాల్యూను అంచనా వేయడానికి ఎంబెడెడ్ వ్యాల్యూ అవసరం. బీమా రంగంలోని కంపెనీల ఎంబెడ్డ్ వ్యాల్యూ 3 రెట్ల మార్కెట్ వ్యాల్యూ ప్రామాణికం. దీని ప్రకారం కంపెనీ మార్కెట్ వ్యాల్యూ రూ.15 లక్షల కోట్లకు పైగా ఉంటుందని అంచనా.

డిపాజిట్ నిబంధన నుండి మినహాయింపు

ఐపీవో ప్రక్రియలో సెక్యూరిటీ డిపాజిట్ నిబంధన నుండి మినహాయింపు ఇవ్వాలని మార్కెట్ నియంత్రణ మండలి సెబిని ఎల్ఐసీ కోరింది. ఎందుకంటే ఐపీవోకు వచ్చే కంపెనీలు ఇష్యూ సైజ్‌లో ఒక శాతానికి సమానమైన సొమ్మును స్టాక్ ఎక్స్చేంజీల వద్ద డిపాజిట్ చేయవలసి ఉంటుంది. ఐపీవో మోసాలను అరికట్టడమే ఈ నిబంధన ముఖ్య ఉద్దేశ్యం.