LIC కొత్త ప్రీమియం దూకుడు, ఆరేళ్లలో రికార్డ్ సేల్స్

ప్రభుత్వరంగ జీవిత బీమా సంస్థ లైఫ్ ఇన్సురెన్స్ కార్పోరేషన్ ఆఫ్ ఇండియా (LIC) హవా కొనసాగుతోంది. 2019-20 ఆర్థిక సంవత్సరంలో ఎల్ఐసీ కొత్త బిజినెస్ ప్రీమియంలో 25 శాతం వృద్ధిని నమోదు చేసింది. గత ఆర్థిక సంవత్సరంలో సంస్థ 2.19 కోట్ల కొత్త పాలసీలను విక్రయించింది. దీని ద్వారా రూ.51,227 కోట్ల తొలి ఏడాది ప్రీమియంను సాధించింది.

గత ఆరేళ్లలో ఎల్‌ఐసీ ఈ స్థాయిలో పాలసీలని విక్రయించటం ఇదే మొదటిసారి. ఎల్ఐసీ మార్కెట్ వ్యాల్యూ 1.19 శాతం మేర పెరిగింది. ఈ ఏడాది మార్చి చివరి నాటికి ఎల్ఐసీ మార్కెట్ వాటా పరంగా పాలసీల్లో 75.9%, ప్రీమియం ఆదాయంలో 68.74% వృద్ధిని సాధించింది. ప్రీమియం ఆదాయంలో 2.5 శాతం వృద్ధిని నమోదు చేసింది. 2019-20లో ప్రయివేటు బీమా కంపెనీల కొత్త బిజినెస్ ప్రీమియం వృద్ధి రేటు 11.64 శాతంగా ఉంది.

మార్చి 2020 నాటికి ఇది 20.3 మిలియన్ మెచ్యూరిటీలు, మనీ బ్యాక్ క్లెయిమ్స్ పరిష్కరించింది. 7,50,000 డెత్ క్లెయిమ్స్ పరిష్కరించింది. మార్చి, ఏప్రిల్ నెలల్లో చెల్లించాల్సిన యాన్యుటీలు కూడా నిర్ణీత తేదీల్లో పరిష్కరించబడ్డాయి. ఎల్ఐసీ పెన్షన్, గ్రూప్ స్కీం ప్రీమియంలు 1 ట్రిలియన్ మార్క్ సాధించాయి.