LIC IPO: ఎల్ఐసీ ఐపీవో ఈ ఆర్థిక సంవత్సరం రాకపోవచ్చు

భారత అతిపెద్ద ఇన్సురర్ లైఫ్ ఇన్సురెన్స్ కార్పోరేషన్ ఆఫ్ ఇండియా(LIC) ఇనిషియల్ పబ్లిక్ ఆఫరింగ్ (IPO) ప్రస్తుత ఆర్థిక సంవత్సరంలో(2021-22) వచ్చే అవకాశాలు కనిపించడం లేదని సంబంధిత వర్గాలు ఆంగ్ల మీడియాతో చెప్పినట్లుగా వార్తలు వచ్చాయి. రష్యా - ఉక్రెయిన్ యుద్ధ పరిణామాల ప్రభావంతో స్టాక్ మార్కెట్లు తీవ్ర హెచ్చుతగ్గులు నమోదు చేస్తున్నాయని, ఇలాంటి పరిస్థితుల్లో ఎల్ఐసీ ఐపీవోకు వెళ్ళకపోవడమే మంచిదని ప్రభుత్వం భావిస్తున్నట్లుగా తెలుస్తోంది.

ఎల్ఐసీ ఐపీవో కోసం డ్రాఫ్ట్ రెడ్ హెర్రింగ్ ప్రాస్పెక్ట్స్‌ను ఫిబ్రవరి 13వ తేదీన సెబి వద్ద ప్రభుత్వం దాఖలు చేసింది. అయితే ప్రస్తుత డ్రాఫ్ట్ ప్రకారం మే 12 వరకు గడువు ఉంది. మరీ ఆలస్యమైతే సెబికి మరో దరఖాస్తు చేసుకోవాల్సి ఉంటుందని అంటున్నారు. ప్రభుత్వం 31.6 కోట్ల షేర్లు లేదా 5 శాతం ఎల్ఐసీ వాటాను ఐపీవోకు తీసుకు రానుంది. ఈ వ్యాల్యూ రూ.60,000 కోట్లుగా ఉంటుందని అంచనాలు ఉన్నాయి.

ఎల్ఐసీ లిస్ట్ అయ్యాక మన దేశంలోని టాప్ 2 కంపెనీలు రిలయన్స్ ఇండస్ట్రీస్, టీసీఎస్‌లను ఈ ఇన్సురెన్స్ సంస్థ మార్కెట్ క్యాప్ దాడిపోతుందని చెబుతున్నారు. ఎల్ఐసీ ఐపీవోలో 35 శాతం రిటైల్ ఇన్వెస్టర్లకు రిజర్వ్ చేస్తారు. ఎల్ఐసీ పాలసీదారులకు కూడా ప్రత్యేక డిస్కౌంట్ ఉంటుందని చెబుతున్నారు.