LIC మరో అవకాశం, రద్దయిన పాలసీ పునరుద్ధరణపై గుడ్‌న్యూస్

ఏదైనా కారణంతో మీ ఇన్సురెన్స్ పాలసీ రద్దయిందా? అయితే ఈ గుడ్ న్యూస్ మీకోసమే. ఏ కారణంతో అయినా ప్రీమియం చెల్లించలేక మధ్యలో రద్దైన వ్యక్తిగత పాలసీల పునరుద్ధరణకు అవకాశం కల్పిస్తున్నట్లు LIC తెలిపింది. రద్దయిన లేదా ల్యాప్స్ అయిన పాలసీల పునరుద్ధరణ కోసం ఓ ప్రచారోద్యమం ప్రారంభించింది. గురువారం ప్రారంభించిన ఈ కార్యక్రమం మార్చి 6వ తేదీ వరకు కొనసాగుతోంది.

కొన్ని షరతులకు లోబడి పాలసీదారులు తమ రద్దయిన పాలసీలను ఈ మధ్య కాలంలో పునరుద్ధరించుకోవాలి. పాలసీ పునరుద్ధరణ కోసం 1526 శాటిలైట్ కార్యాలయాలు ప్రారంభించారు. గత ఏడాది కూడా ఎల్ఐసీ పాలసీ పునరుద్ధరణ కోసం ఓ కార్యక్రమం ప్రవేశపెట్టింది. 2020లో ఆగస్ట్ 10 నుండి పునరుద్ధరణకు అవకాశం కల్పించింది.

కొన్ని నిబంధనలు, షరతులకు లోబడి అయిదేళ్ల నుండి తీసుకున్న నిర్ధిష్ట అర్హత కలిగిన పాలసీలను చెల్లించని మొదటి ప్రీమియం నుండి పునరుద్ధరించుకోవచ్చు. అనివార్య పరిస్థితుల్లో ప్రీమియం చెల్లించని వారికి ఇది ప్రయోజనకరం. పాలసీదారులు తమ ఇన్సురెన్స్ పాలసీని కొనసాగించాలని కోరుకునే వారికి ఇది మంచి అవకాశం.