LIC listing: స్టాక్ మార్కెట్‌లో ఎల్ఐసీ లిస్టింగ్, 8% డిస్కౌంట్‌తో రూ.867 వద్ద లిస్ట్

లైఫ్ ఇన్సురెన్స్ కార్పోరేషన్ ఆఫ్ ఇండియా (LIC) షేర్లు మంగళవారం (మే 17) స్టాక్ ఎక్స్చేంజీలో లిస్ట్ అయ్యాయి. బీఎస్ఈ, ఎన్ఎస్ఈలలో ట్రేడ్ అయ్యాయి. ఎల్ఐసీ 8.62 శాతం డిస్కౌంట్‌తో రూ.867.20 వద్ద లిస్ట్ అయింది.

కేంద్రం ఎల్ఐసీలో 22.13 కోట్ల షేర్లను లేదా 3.5 శాతం ఐపీవో ద్వారా విక్రయించి రూ.20,557 కోట్లు సమీకరించింది. ఇన్వెస్టర్లకు కేటాయించే షేర్లకు ఒక్కోదానికి ధరను రూ.949గా నిర్ణయించింది. ఎల్ఐసీ పాలసీదారులకు రూ.60 డిస్కౌంట్‌తో రూ.889 ధరపై షేర్లను కేటాయించగా, రిటైల్ ఇన్వెస్టర్లకు రూ.45 డిస్కౌంట్‌తో రూ.904 ధరతో షేర్లను అలాట్ చేశారు. మూడు రెట్లు ఓవర్ సబ్‌స్క్రైబ్ అయింది. ఎల్ఐసీ ఐపీవో సబ్‌స్క్రిప్షన్ మే 4న ప్రారంభమై, 9వ తేదీన ముగిసింది.

రిటైల్, పాలసీదారుల సబ్‌స్క్రిప్షన్ అధికంగా అయింది. 210 షేర్ల కోసం దరఖాస్తు చేసుకుంటే పాలసీదారులకు 48 షేర్లు, రిటైల్ ఇన్వెస్టర్లకు 77 షేర్లు అలాట్ అయ్యాయి. పాలసీదారులు, రిటైలర్లు ఐపీవోలో ఇన్వెస్ట్ చేసిన మొత్తంలో కొంత వెనక్కి వచ్చింది. దీంతో వారు లిస్టింగ్ తర్వాత మరిన్ని షేర్లను కొనే అవకాశాలు ఉంటాయని భావిస్తున్నారు. అయితే మార్కెట్ పరిస్థితికి అనుగుణంగా ఈ నిర్ణయం ఉంటుంది.

ఈ షేర్ ధరను రూ.949గా నిర్ణయించారు. పాలసీదారులకు రూ.60, రిటైలర్లకు, ఉద్యోగులకు రూ.45 డిస్కౌంట్ ఇచ్చారు. మార్కెట్ వాటాలో ఎల్ఐసీదే 60 శాతానికి పైగా ఉంది. కానీ గత కొంతకాలంగా ఎల్ఐసీ మార్కెట్ పడిపోతోంది. ప్రయివేటు సంస్థల నుండి తీవ్రమైన పోటీ ఎదురవుతోంది. ఈ నేపథ్యంలో ఆదరణ ఎలా ఉంటుందనేది చూడాలి.