ఎల్ఐసీ ఐపీవోకు ముందు సీఎఫ్ఓగా సునీల్ అగర్వాల్, రిలయన్స్ నిప్పోన్ నుండి...

కోట్లాదిమంది ఎదురు చూస్తున్నారు ఎల్ఐసీ ఐపీవో కోసం. ప్రస్తుత ఆర్థిక సంవత్సరంలోనే ఎల్ఐసీ ఐపీవో రావాల్సి ఉన్నప్పటికీ, రష్యా-ఉక్రెయిన్ యుద్ధం నేపథ్యంలో రాక ఆలస్యమవుతోంది. 2022-23 ఆర్థిక సంవత్సరంలో ఇది రానుంది. ఎల్ఐసీ ఐపీవోకు అనుగుణంగా ప్రభుత్వం అనేక చర్యలు చేపడుతోంది. తాజాగా తమ ముఖ్య ఆర్థిక అధికారి(CFO)గా రిలయన్స్-నిప్పోన్ లైఫ్ ఇన్సురెన్స్ ఎగ్జిక్యూటివ్‌గా పని చేసిన సునీల్ అగర్వాల్‌‍ను నియమించింది.

బుధవారం ఆయన బాధ్యతలు స్వీకరించినట్లు చెబుతున్నారు. CFOను బయటి నుండి నియమించుకోవడం ఎల్ఐసీకి ఇది మొదటిసారి. ఈయనకు ముందు ఎల్ఐసీ ఎగ్జిక్యూటివ్ డైరెక్టర్ శుభాంగి సంజయ్ సోమన్ సీఎఫ్ఓగా బాధ్యతలు నిర్వర్తించారు. సునీల్ అగర్వాల్ ఎల్ఐసీలోకి రావడానికి ముందు రిలయన్స్ నిప్పోన్ లైఫ్ ఇన్సురెన్స్ కార్పోరేషన్‌లో పుష్కరకాలం పని చేశారు. ఐసీఐసీఐ ప్రుడెన్షియల్ లైఫ్ ఇన్సురెన్స్‌లో కూడా అయిదేళ్లు పని చేశారు.

ఎల్ఐసీ గత సెప్టెంబర్ నెలలో సీఎఫ్ఓ పోస్టుకు దరఖాస్తులను ఆహ్వానించింది. ఈ ఉద్యోగం కాంట్రాక్ట్ పద్ధతిలో ఉంటుందని, వార్షిక వేతనం రూ.75 లక్షలు అందిస్తామని పేర్కొంది. ఈ నియామకం మూడేళ్ల పాటు ఉంటుంది లేదా అభ్యర్థికి 63 ఏళ్ల వయస్సు వచ్చే వరకు ఉంటుంది.