Lic Ipo: మే తొలివారంలో ఎల్ఐసీ ఐపీవో, 3.5% వాటా విక్రయం!

లైఫ్ ఇన్సురెన్స్ కార్పోరేషన్ ఆఫ్ ఇండియా(LIC) వచ్చే నెలలో పబ్లిక్ ఇష్యూకు (IPO)కు రానుందా? అంటే అవుననే వాదనలు వినిపిస్తున్నాయి. ఈ మేరకు ప్రభుత్వం తాజాగా డ్రాఫ్ట్ రెడ్ హెర్రింగ్ ప్రాస్పెక్టస్(DRHP)ని మార్కెట్ రెగ్యులేటర్ సెబి వద్ద దాఖలు చేసింది. రెడ్ హెర్రింగ్ ప్రాస్పెక్టస్(RHP)ని వచ్చే నెల అంటే మే నెల మొదటి వారంలో దాఖలు చేసే అవకాశాలు కనిపిస్తున్నాయి. ఎల్ఐసీ DRHP అప్రూవల్ సెక్యూరిటీస్ అండ్ ఎక్స్చేంజ్ బోర్డ్ ఆఫ్ ఇండియా(SEBI) నుండి సోమవారం వరకు రావొచ్చునని తెలుస్తోంది.

ఈ నేపథ్యంలో మే నెల మొదటి వారంలో ఎల్ఐసీ ఐపీవోకు రావొచ్చునని తెలుస్తోంది. అలాగే, ఇష్యూ సైజ్‌ను తగ్గించవచ్చునని తెలుస్తోంది. గతం డ్రాఫ్ట్‌లో ఎల్ఐసీ వాటాను 5 శాతం మేర విక్రయించాలని భావించినప్పటికీ, తాజా డ్రాఫ్ట్‌లో 3.5 శాతానికి తగ్గించే అవకాశాలు కనిపిస్తున్నాయి. ఈ వాటా విక్రయం ద్వారా రూ.21,000 కోట్లను సమీకరించాలని వచ్చే నెల ఇష్యూకు వచ్చే అవకాశముందని తెలుస్తోంది.

రష్యా-ఉక్రెయిన్ యుద్ధం వల్ల మార్కెట్ ఊగిసలాటకు గురి కావడంతో ఇష్యూ పరిమాణాన్ని తగ్గించాలని ప్రభుత్వం భావించినట్లుగా తెలుస్తోంది. ప్రభుత్వానికి ఎల్ఐసీలో వంద శాతం వాటా ఉంది. దీనిని రూ.6 లక్షల కోట్లుగా లెక్కగట్టారు.