LIC IPO: ఎల్ఐసీ ఐపీవోకు సెబి ఆమోదం, 22 రోజుల్లోనే పూర్తి

భారత మార్కెట్ రెగ్యులేటర్ సెక్యూరిటీస్ అండ్ ఎక్స్చేంజ్ బోర్డ్ ఆఫ్ ఇండియా(SEBI) ఎల్ఐసీ ఐపీవోకు పచ్చజెండా ఊపింది. సెబి ఆమోదం లభించినట్లు ఈ వ్యవహారంతో సంబంధం ఉన్న ఓ అధికారి తెలిపినట్లు మీడియాలో కథనాలు వచ్చాయి. దరఖాస్తు చేసుకున్న 22 రోజుల్లోనే అనుమతి లభించడం గమనార్హం. సాధారణంగా ముప్పై రోజుల నుండి నలభై రోజులు పడుతుంది. ఎల్ఐసీ విషయంలో మాత్రం ప్రక్రియ వేగంగా పూర్తయింది.

సెబి అనుమతి లభించాక ఐపీవోకు వెళ్లడమే ఆలస్యం. అయితే ఇక ఎప్పుడు ఐపీవోకు వెళ్లాలనేది ప్రభుత్వం నిర్ణయించవలసి ఉంటుంది. ప్రస్తుత ఆర్థిక సంవత్సరంలోనే ఐపీవోను ముగించాలని ప్రభుత్వం భావించింది. కానీ రష్యా-ఉక్రెయిన్ యుద్ధం నేపథ్యంలో ఆలస్యమైంది. ఇప్పుడు యుద్ధం దాదాపు నిలిచిపోయినట్లుగా కనిపిస్తోంది. ఈ నేపథ్యంలో ఐపీవోపై ప్రభుత్వం త్వరపడవచ్చునని భావిస్తున్నారు.

యుద్ధం నేపథ్యంలో మార్కెట్ పరిస్థితులు పెట్టుబడులకు అనుకూలంగా లేవని ప్రభుత్వం భావించి ప్రారంభంలో వాయిదా వేసింది. అయితే మార్కెట్ పరిస్థితులు ఎంత త్వరగా సానుకూలంగా మారితే, అంత త్వరగా రావొచ్చు. ఎల్ఐసీ ఐపీవో కోసం ప్రభుత్వం ఫిబ్రవరి 13న డ్రాఫ్ట్‌ను దాఖలు చేసింది. ఇందులో 5 శాతం వాటాను ప్రభుత్వం విక్రయిస్తుంది. వీటి వ్యాల్యూ రూ.31.6 కోట్లు.