LIC IPO: 1 కోటి మంది వరకు రిటైల్ ఇన్వెస్టర్లు పాల్గొనే ఛాన్స్, డిమ్యాట్ ఖాతాలు పెరగొచ్చు

లైఫ్ ఇన్సురెన్స్ కార్పోరేషన్ ఆఫ్ ఇండియా(LIC) మోగా ఐపీవోలో కోటిమంది వరకు రిటైల్ ఇన్వెస్టర్లు పెట్టుబడి పెట్టే అవకాశాలు కనిపిస్తున్నాయి. ఈ మేరకు ప్రభుత్వరంగ బీమా దిగ్గజం అంచనా వేస్తోంది. తమ పాలసీదారులతో పాటు ఫైనాన్షియల్ మార్కెట్‌లలో పెట్టుబడులు పెట్టే ప్రజల్లో కనీసం ఏడోవంతు ఎల్ఐసీ ఇనిషియల్ పబ్లిక్ ఆఫర్‌లో (IPO) ఇన్వెస్ట్ చేస్తారని భావిస్తోంది. ఆఫర్ బుకింగ్ సంస్థలు, ఇతర మార్కెట్ భాగస్వాముల నుండి అందిన సమాచారం మేరకు ఈ అంచనాకు వచ్చినట్లు చెబుతోంది.

75 లక్షల నుండి 1 కోటి దరఖాస్తులు రిటైల్ ఇన్వెస్టర్ల నుండి వస్తాయని భావిస్తోంది. వీటి వ్యాల్యూ రూ.25,000 కోట్ల పెట్టుబడుల వరకు ఉంటుందని భావిస్తున్నారు. ఒక్కో రిటైల్ దరఖాస్తు ధర సగటున రూ.30,000 నుండి రూ.40,000 వరకు పెట్టుబడి వస్తుందని భావిస్తోంది. దేశంలో ప్రస్తుతం 7 కోట్లకు పైగా డీమ్యాట్ ఖాతాదారులు ఉన్నారు.

ఐపీవోలోకి పాలసీదారులను ఎల్ఐసీ ఆకర్షించే ప్రయత్నాలు చేస్తున్నందున డీమ్యాట్ ఖాతాదారుల సంఖ్య 8 కోట్లకు చేరుతుందని అంచనా. మార్చి నెలలో ఎల్ఐసీ ఐపీవో రానుంది. వ్యక్తిగత ఇన్వెస్టర్ల పెట్టుబడులను ఆకర్షించేందుకు ఇన్వెస్ట్‌మెంట్ బ్యాంకర్లు చురుగ్గా ప్రయత్నాలు ప్రారంభిస్తున్నారని, దేశవ్యాప్తంగా ఆసక్తి కనిపిస్తోందని అంటున్నారు. గత ఏడాది మార్చి నాటికి ఎల్ఐసీకి 13.5 లక్షల మంది ఏజెంట్లు ఉన్నారు.