LIC: రాకెట్ వేగంతో దూసుకెళ్లిన LIC లాభాలు.. పోర్టుఫోలియోలోని ఈ స్టాక్సే కారణం

LIC: దేశవ్యాప్తంగా బీమా సేవలు అందిస్తున్న దిగ్గజ సంస్థ LIC. అతిపెద్ద పెట్టుబడిదారుగానూ వ్యవహరిస్తోంది. పబ్లిక్ ట్రేడెడ్ కంపెనీల్లో ఇన్వెస్ట్ చేసి భారీగా లాభాలు ఆర్జిస్తోంది. మార్చి 31తో ముగిసిన ఆర్థిక సంవత్సరంలో దాదాపు 65.50 వేల కోట్లకు పైగా లాభాన్ని సాధించింది. LIC పోర్ట్ ఫోలియోలో టాప్ 10 లిస్టెడ్ కంపెనీలే దాదాపు 50 శాతం ఉన్నాయి.

పరస్పరం విరుద్ధమైన పెట్టుబడి విధానాన్ని LIC అనుసరిస్తోందని ముంబైకి చెందిన ఓ ప్రముఖ మార్కెట్ విశ్లేషకుడు తెలిపారు. తద్వారా క్షీణతలోనూ లాభాలను నమోదు చేయగల సత్తా సొంతం చేసుకున్నట్లు వెల్లడించారు. చాలా మంది ఫండ్ మేనేజర్లు ఈ విధంగా చేయడానికి ప్రయత్నిస్తున్నట్లు పేర్కొన్నారు. మార్కెట్ పతనమైన వేళ షేర్లను సేకరించి, పెరిగినప్పుడల్లా లాభాలను బుక్ చేసుకోవడమే LIC స్ట్రాటజీ అని చెప్పారు.

రిలయన్స్ ఇండస్ట్రీస్ లిమిటెడ్, ITC లిమిటెడ్, టాటా కన్సల్టెన్సీ సర్వీసెస్ లిమిటెడ్, ICICI బ్యాంక్ లిమిటెడ్, ఇన్ఫోసిస్ లిమిటెడ్, స్టేట్ బ్యాంక్ ఆఫ్ ఇండియా, లార్సెన్ & టర్బో, HDFC బ్యాంక్ లిమిటెడ్, HDFC వంటి దిగ్గజ సంస్థల్లో పెట్టుబడి ద్వారా.. గణనీయంగా LIC లాభపడిందని ప్రముఖ మీడియా సంస్థ విశ్లేషించింది. వీటన్నిటిలో LIC హోల్డింగ్ మొత్తం విలువ 4.65 ట్రిలియన్లు కాగా.. తన మొత్తం ఇన్వెస్ట్ మెంట్ 9 ట్రిలియన్లు అని అంచనా.

ఈ ఆర్థిక ఏడాదిలోనూ మార్కెట్‌లలో రికార్డు స్థాయిలో 2.4 ట్రిలియన్ పెట్టుబడి పెట్టాలని LIC యోచిస్తోంది. దీనిని కేవలం అతిపెద్ద ఇన్వెస్ట్ మెంట్‌ గా మాత్రమే కాకుండా, పాలసీదారులకు గరిష్ఠ రాబడిని అందించడంలో మరో ముందడుగుగా చూడాల్సి ఉంటుంది. ఎందుకంటే తన పెట్టుబడుల ద్వారా సాదించిన లాభాలను.. మార్కెట్-లింక్డ్ పాలసీ హోల్డర్లకు బోనస్‌ గా, ప్రభుత్వంతో సహా ఇతర వాటాదారులకు డివిడెండ్ రూపంలో చెల్లించడానికి LIC వినియోగిస్తుంది.