ఎక్కడైనా చేయవచ్చు: LIC క్లెయిమ్ గుడ్‌న్యూస్, ఐతే ఈ నెల 31 వరకే అవకాశం

ప్రభుత్వరంగ బీమా దిగ్గజం లైఫ్ ఇన్సురెన్స్ కార్పోరేషన్ ఆఫ్ ఇండియా (LIC) మెచ్యూరిటీ క్లెయిమ్ చేసుకునే వారికి గుడ్ న్యూస్ చెప్పింది. పాలసీహోల్డర్లు తమ ఎల్ఐసీ మెచ్యూరిటీ క్లెయిమ్ డాక్యుమెంట్స్‌ను దేశంలో ఎక్కడైనా సమర్పించవచ్చునని ఇటీవల ప్రకటనలో తెలిపింది. ఈ ప్రకటన ప్రకారం 'మెచ్యూరిటీ పేమెంట్స్ డ్యూస్‌కు సంబంధించి ఏ బ్రాంచీ పాలసీదారు అయినా తమ మెచ్యూరిటీ క్లెయిమ్స్‌ను 113 డివిజనల్ ఆఫీస్, 2048 బ్రాంచీలు, 1526 శాటిలైట్ ఆఫీస్‌లు, 74 కస్టమర్ జోన్లలో మెచ్యూరిటీ క్లెయిమ్స్ సమర్పించవచ్చును' అని తెలిపింది.

కరోనా కారణంగా క్లెయిమ్స్ విషయంలో పాలసీదారులు ఎదుర్కొంటోన్న ఇబ్బందుల నేపథ్యంలో మెచ్యూరిటీ తీరిన పాలసీలను తమ సమీప ఎల్ఐసీ కార్యాలయంలో క్లెయిమ్ చేసుకునే వెసులుబాటు కల్పించడం పాలసీదారులకు అతిపెద్ద ఊరట. అయితే ఈ అవకాశం ఈ మార్చి 31వ తేదీ వరకు మాత్రమే ఉంటుంది. పాలసీ క్లెయిమ్స్ కోసం పాలసీదారులు తమ సమీప ఎల్ఐసీ ఆఫీస్‌లో సంబంధిత పత్రాలను సమర్పించాలి.

పాలసీదారుడు తన సర్వీసింగ్ బ్రాంచీతో సంబంధం లేకుండా ఏ సమీప బ్రాంచీ నుండి అయినా మెచ్యూరిటీ క్లాయిమ్స్ చేసుకోవచ్చు. అయితే ఎక్కడ దరఖాస్తు చేసుకున్నా క్లెయిమ్స్ చెల్లింపును మాత్రం సంబంధిత సర్వీసింగ్ బ్రాంచీ మాత్రమే ప్రాసెస్ చేస్తుంది. మొదట పాలసీదారు అందించిన డాక్యుమెంట్లను ఆన్‌లైన్ ద్వారా సంబంధిత సర్వీసింగ్ బ్రాంచీకి బదిలీ చేస్తుంది. ఈ క్లెయిమ్స్‌కు సంబంధించిన ప్రక్రియను సులభతరం చేసేందుకు సంబంధిత అధికారులకు ప్రత్యేక అధికారం ఉంటుంది.