భారత్‌ అరుదైన ఘనత: అమెరికా, చైనాల సరసన మన దేశం.. ఇకపై రోడ్లపై ఆ కష్టాలు ఉండవు!

దేశవ్యాప్తంగా వాహనాల సంఖ్య పెరుగుతుండటంతో, ఇంధన అవసరాలను తీర్చేందుకు చమురు కంపెనీలు శరవేగంగా విస్తరిస్తున్నాయి. తాజా సమాచారం ప్రకారం.. భారతదేశంలో పెట్రోల్ బంకుల సంఖ్య లక్ష దాటింది. కేవలం గత పదేళ్లలోనే బంకుల సంఖ్య దాదాపు రెట్టింపు అవ్వడం విశేషం. ఈ భారీ విస్తరణతో అమెరికా, చైనా తర్వాత ప్రపంచంలోనే అత్యధిక పెట్రోల్ బంకులు కలిగిన మూడో దేశంగా భారత్ నిలిచింది.

గ్రామీణ ప్రాంతాల్లో పెరిగిన నెట్‌వర్క్

ఒకప్పుడు పెట్రోల్ పోయించుకోవాలంటే కిలోమీటర్ల దూరం వెళ్లాల్సి వచ్చేది. కానీ ఇప్పుడు పరిస్థితి మారింది. మొత్తం నెట్‌వర్క్‌లో 29 శాతం బంకులు కేవలం గ్రామీణ ప్రాంతాల్లోనే ఉన్నాయి. పదేళ్ల క్రితం ఇది కేవలం 22 శాతంగా ఉండేది. ప్రభుత్వ రంగ సంస్థలైన ఇండియన్ ఆయిల్(Indian Oil), హెచ్‌పీసీఎల్(HPCL), బీపీసీఎల్(BPCL) వంటి కంపెనీలు మారుమూల ప్రాంతాలకు కూడా ఇంధనాన్ని చేరవేస్తున్నాయి. దీనివల్ల ప్రయాణికులకు సౌకర్యం పెరగడమే కాకుండా, పోటీ పెరిగి కస్టమర్ సర్వీస్ కూడా మెరుగుపడింది.

ఇకపై పెట్రోల్ మాత్రమే కాదు.. EV ఛార్జింగ్ కూడా!

మారుతున్న కాలానికి అనుగుణంగా పెట్రోల్ బంకులు కూడా తమ రూపురేఖలను మార్చుకుంటున్నాయి. ఇప్పుడు బంకుల్లో కేవలం పెట్రోల్, డీజిల్ మాత్రమే కాకుండా.. సీఎన్జీ (CNG), ఎలక్ట్రిక్ వాహనాల కోసం EV Charging పాయింట్లను కూడా ఏర్పాటు చేస్తున్నారు. దేశంలోని మూడో వంతు బంకుల్లో ప్రస్తుతం ఈ ప్రత్యామ్నాయ ఇంధన సౌకర్యాలు అందుబాటులోకి వచ్చాయి. దీనివల్ల బంక్ యజమానులకు అదనపు ఆదాయం లభించడమే కాకుండా పర్యావరణానికి కూడా మేలు జరుగుతోంది.

బిజినెస్‌లో సవాళ్లు: లాభసాటిగా ఉన్నాయా?

సంఖ్య పరంగా భారత్ రికార్డు సృష్టించినప్పటికీ ఆర్థికంగా కొన్ని సవాళ్లు ఉన్నట్లు తాజా నివేదికలు చెబుతున్నాయి. ఇండోనేషియా వంటి దేశాల్లో కేవలం 9,000 బంకులు ఉన్నప్పటికీ.. భారత్‌లో లక్ష దాటడంపై పరిశ్రమ వర్గాల్లో చర్చ జరుగుతోంది. పోటీ ఎక్కువగా ఉండటం వల్ల పాత బంకుల అమ్మకాలు తగ్గుతున్నాయని, కొన్ని చోట్ల నిర్వహణ ఖర్చులు కూడా రావడం లేదని ఆల్ ఇండియా పెట్రోలియం డీలర్స్ అసోసియేషన్ ఆందోళన వ్యక్తం చేస్తోంది.

ప్రైవేట్ కంపెనీల పరిస్థితి ఏంటి?

ఇంత పెద్ద మార్కెట్‌లో రిలయన్స్ ఇండస్ట్రీస్, నయారా ఎనర్జీ వంటి ప్రైవేట్ సంస్థల వాటా కేవలం 10 శాతం కంటే తక్కువగానే ఉంది. ప్రభుత్వ ధరల నియంత్రణ వల్ల ప్రైవేట్ కంపెనీలు భారీ పెట్టుబడులు పెట్టేందుకు వెనకాడుతున్నాయి. అయినప్పటికీ భవిష్యత్తులో గ్యాస్, ఎలక్ట్రిక్ వాహనాల వినియోగం పెరిగితే ఈ బంకులు మల్టీ-ఫ్యూయల్ హబ్‌లుగా మారి లాభాల్లోకి వస్తాయని నిపుణులు అంచనా వేస్తున్నారు.

ఏదేమైనా పెట్రోల్ బంకుల సంఖ్య పెరగడం దేశాభివృద్ధికి సూచికే అని చెప్పాలి. అయితే అవి ఆర్థికంగా నిలదొక్కుకోవాలంటే కేవలం ఇంధనంపైనే కాకుండా ఈవీ ఛార్జింగ్ వంటి ఆధునిక సేవలపై దృష్టి సారించాల్సి ఉంటుంది.