ఎల్ అండ్ టీ ఇన్ఫోటెక్, మైండ్ ట్రీ విలీనమవుతున్నాయా?

అంతర్జాతీయ సాఫ్టువేర్ దిగ్గజాలతో పోటీపడేలా దేశీయంగా మరో పెద్ద ఐటీ సంస్థ ఏర్పాటుకు అడుగులు పడుతున్నాయి. ఇందులో భాగంగా తమ నియంత్రణలోని టెక్ సంస్థలు మైండ్ ట్రీ, ఎల్ అండ్ టీ ఇన్ఫోటెక్‌లను విలీనం చేయాలని లార్సన్ అండ్ టుబ్రో లిమిటెడ్ భావిస్తోందని వార్తలు వచ్చాయి. ఈ రెండు సంస్థలు స్టాక్ ఎక్స్చేంజీల్లో నమోదయ్యాయి. కంపెనీల విలీనానికి సంబంధించిన షేర్లు మార్పిడి నిష్పత్తిని, మైండ్ ట్రీ, ఎల్ అండ్ టీ ఇన్ఫోటెక్ బోర్డులు వచ్చేవారం మొదట్లో పరిశీలించవచ్చునని చెబుతున్నారు.

మైండ్ ట్రీలో ఎల్ అండ్ టీకి 61 శాతం వాటా ఉంది. 2019లో మైండ్ ట్రీలో నియంత్రిత వాటాను ఎల్ అండ్ టీ కొనుగోలు చేసింది. 8.3 బిలియన్ డాలర్లు మన కరెన్సీలో రూ.62,250 కోట్ల మార్కెట్ వ్యాల్యూ కలిగిన మైండ్ ట్రీలో ఎల్ అండ్ టీకి 61 శాతం వాటా ఉంది. 13.6 బిలియన్ డాలర్లు లేదా రూ.1.02 లక్షల కోట్ల మార్కెట్ వ్యాల్యూ కలిగిన ఎల్ అండ్ టీ ఇన్ఫోటెక్‌లో ఎల్ అండ్ టీకి 74 శాతం వాటా ఉంది. ఈ రెండు కంపెనీలు విలీనమైతే 22 బిలియన్ డాలర్ల వ్యాల్యూ కలిగిన సంస్థగా నిలుస్తుంది. మన కరెన్సీలో రూ.1.65 లక్షల కోట్ల వరకు ఉంటుంది.

ఈ రెండు కంపెనీల వ్యాపారాల్లో లేదా క్లయింట్స్ విషయంలో సారూప్యత తక్కువగా ఉంది. ఈ రెండు సంస్థలు కలిస్తే ప్రాజెక్టుల ధరల విషయంలో ఖాతాదారులతో మరింత మెరుగ్గా వ్యవహరించేందుకు వీలవుతుందని, వ్యయాలు తగ్గుతాయని భావిస్తున్నారు. అయితే విలీనం వార్తలపై మైండ్ ట్రీ స్పందించింది. మైండ్ ట్రీ, ఎల్ అండ్ టీ ఇన్ఫోటెక్ విలీనం వార్తలు ఊహాజనితమే అని పేర్కొంది.