షేర్ మార్కెట్‌ను షేక్ చేసిన ఇన్‌ఫ్రాస్ట్రక్చర్ కంపెనీ.. 8 వేల కోట్ల ప్రాజెక్టు సొంతం కావడంతో..

Share Market: దేశంలో మౌలిక సదుపాయాల కల్పనకు కేంద్రంలోని నరేంద్ర మోదీ సర్కారు ప్రాముఖ్యత ఇస్తూ వస్తోంది. మొన్నటికి మొన్న వందే భారత్ రైళ్లను ప్రవేశపెట్టింది. అనాదిగా ఉన్న రైళ్ల స్పీడ్ పెంచింది. బుల్లెట్ ట్రైన్స్ ను సైతం ప్రవేశపెట్టేందుకు సిద్ధమైంది. ఇందుకు సంబంధించి బిడ్డింగ్ ప్రక్రియ సైతం ముగిసింది. దేశీయ ఇన్ఫ్రాస్ట్రక్చర్ దిగ్గజం ఈ కాంట్రాక్ట్ దక్కించుకుంది.

ప్రతిష్ఠాత్మక ముంబై-అహ్మదాబాద్ హై స్పీడ్ రైలు ప్రాజెక్టుకు కీలక ముందడుగు పడింది. ఇందులో భాగంగా 135.45 కిలోమీటర్ల మేర MAHSR-C3 ప్యాకేజ్ నిర్మాణానికి L&T కన్స్ట్రక్షన్స్ కాంట్రాక్ట్ దక్కించుకుంది. నేషనల్ హైస్పీడ్ రైల్ కార్పొరేషన్ లిమిటెడ్(NHSRCL) నుంచి ఈ మెగా ప్రాజెక్టు కైవసం చేసుకున్నట్లు తన ఎక్స్ఛేంజ్ ఫైలింగ్ లో పేర్కొంది.

508 కిలోమీటర్లు కొనసాగే ఈ హైస్పీడ్ రైల్ ప్రాజెక్టును బుల్లెట్ ట్రైన్ ప్రాజెక్ట్ అని కూడా పిలుస్తారు. మహారాష్ట్ర దాదాపు 156 కిలోమీటర్లు, దాద్రా నగర్ హవేలీలో నాలుగున్నర కి.మీలు, గుజరాత్ లో 348 కిలోమీటర్లు చొప్పున ఈ ప్రాజెక్టు నిర్మాణం జరుగుతుంది. ఇందులో మొత్తం 12 స్టేషన్లు ఉంటాయి.

ఈ కాంట్రాక్ట్ కు సంబంధించి MAHSR-C3 పరిధిలో పలు స్టేషన్లు, నదీ వంతెనలు, సొరంగాలు సహా వివిధ నిర్మాణ కార్యక్రమాలను L&T పూర్తి చేయనుంది. ఈ ప్రాజెక్టు విలువను కంపెనీ వెల్లడించనప్పటికీ, 8 వేల కోట్ల వరకు ఉంటుందని భావిస్తున్నారు. ఈ కాంట్రాక్ట్ సాధించడంతో దాని షేర్ విలువ 4 శాతం పెరిగి 52 వారాల గరిష్ఠ స్థాయికి చేరుకుంది. తద్వారా సెన్సెక్స్లో లీడ్ గెయినర్‌ గా అవతరించింది.