Stock Market: ఈవారం కీలకంగా RBI మీటింగ్.. ఇన్వెస్టర్లు పరిశీలించాల్సిన అంశాలివే..

Market Next Week: గడచిన వారం కొంత ఒడిదొడుకులు ఉన్నప్పటికీ దేశీయ స్టాక్ మార్కెట్లు మంచి ర్యాలీని నమోదు చేశాయి. అయితే అనేక మేజర్ ఈవెంట్స్ ఉన్న తరుణంలో డిసెంబర్ మెుదటి వారంపై అందరి దృష్టి పడింది.

ఈవారంలో ముఖ్యమైన అంశాల జాబితాను పరిశీలిస్తే.. రిజర్వ్ బ్యాంక్ ఆఫ్ ఇండియా సమావేశం, 4 రాష్ట్రాల ఎన్నికల ఫలితాలు, పెరిగిన ఫారెక్స్ నిల్వలు, ప్రపంచ మార్కెట్ సూచనలతో సహా ఇతర అంశాలపై మార్కెట్లు తమ దృష్టిని కేంద్రీకరించాయి. ఇదే తరుణంలో దేశీయ ఈక్విటీ బెంచ్‌మార్క్ సూచీ నిఫ్టీ-50 ఇటీవల రికార్డు గరిష్టాలను తాకింది. మిడ్‌క్యాప్ ఇండెక్స్ కూడా వరుసగా 15వ సెషన్‌లో రికార్డు స్థాయిలో ముగిసింది.

సెన్సెక్స్ సూచీ ర్యాలీతో 11-వారాల గరిష్ఠాన్ని తాకింది. సెప్టెంబర్ 18 నుంచి అత్యధిక ముగింపు స్థాయికి చేరుకుంది. నిఫ్టీ 50తో పాటు వరుసగా ఐదవ వారపు లాభాలను నమోదు చేసింది. మొత్తం 13 ప్రధాన రంగాలు వారంలో లాభాలను నమోదు చేశాయి. రెండవ త్రైమాసికంలో జీడీపీ గణాంకాలు వాస్తవంగా ఆర్బీఐ అంచనాలను మించటం భారత ఆర్థిక వ్యవస్థపై సానుకూల సంకేతాలు మార్కెట్లను ప్రభావితం చేస్తున్నాయి.

H2FY24లో వృద్ధిని పెంపొందించడం ద్వారా ప్రభుత్వ వ్యయం, అధిక వినియోగం గురించి పెట్టుబడిదారులు ఆశాజనకంగా ఉన్నారని జియోజిత్ ఫైనాన్షియల్ సర్వీసెస్ రీసెర్చ్ హెడ్ వినోద్ నాయర్ పేర్కొన్నారు. దీనికి తోడు మార్కెట్లో జాబితా అయ్యేందుకు వస్తున్న ఐపీవోలు సైతం ఇన్వెస్టర్లను అధికంగా యాక్టివ్ చేస్తున్నాయి. మొత్తంమీద అసెంబ్లీ ఎన్నికల ఫలితాల వల్ల మార్కెట్లలో కొంత అస్థిరతలు ఉండొచ్చని విశ్లేషకులు అంచనా వేస్తున్నారు.