Credit Card: ఫ్యూయెల్ క్రెడిట్ కార్డ్ తీసుకుంటున్నారా..?? ఉత్తమమైనది ఇలా ఎంచుకోండి..

Fuel Credit Card: ఈరోజుల్లో చాలా మంది ఉద్యోగాలు చేస్తున్న తరుణంలో తమ బ్యాంకుల నుంచి క్రెడిట్ కార్డులను పొందుతున్నారు. వీటి ద్వారా బహుమతులు, తగ్గింపులను పొందుతున్నారు. ఈ క్రమంలోనే చాలా మంది ఇంధన భారాన్ని తగ్గించుకునేందుకు ఫ్యూయెల్ కార్డులను ఎంపిక చేసుకుంటున్నారు.

ఎలక్ట్రిక్ వాహనాలకు మారేంత వరకు కార్లు, టూవీలర్లకు తప్పకుండా పెట్రోల్, డీజిల్ కొనుగోలు తప్పనిసరి. అయితే మీరు ఇంధన క్రెడిట్ కార్డ్‌ని ఉపయోగించడం ద్వారా ఖచ్చితంగా ఇంధన ఖర్చులను తగ్గించుకోవచ్చు. ఇవి తగ్గింపులు, ఉత్తేజకరమైన రివార్డ్‌లు, ఇంధన సర్‌ఛార్జ్ మినహాయింపులను పొందటంలో వాహనదారులకు సహాయపడతాయి. బీపీసీఎల్, ఇండియన్ ఆయిల్, హిందుస్థాన్ పెట్రోలియం వంటి చమురు కంపెనీలు బ్యాంకుల భాగస్వామ్యంతో ఫ్యూయెల్ క్రెడిట్ కార్డులను అందిస్తున్నాయి. ఫ్యూయల్ క్రెడిట్ కార్డ్‌తో ప్రయాణ బీమా, రోడ్‌సైడ్ అసిస్టెన్స్, హోటల్ స్టే, డైనింగ్ వంటి ఇతర ప్రయోజనాలను కూడా కస్టమర్‌లు పొందవచ్చు.

ఇంధన క్రెడిట్ కార్డ్‌లను పొందడానికి వేర్వేరు బ్యాంకులు వివిధ అర్హత ప్రమాణాలను కలిగి ఉన్నాయి. కాబట్టి ముందుగా బ్యాంకును సంప్రదించి మీరు అర్హులో కాదో తెలుసుకోవటం ఉత్తమం. వీటి ప్రయోజనాలను పరిశీలిస్తే.. ఫ్యూయెల్ కార్డ్‌లు మీరు ఇంధనాన్ని కొనుగోలు చేసిన ప్రతిసారీ క్యాష్‌బ్యాక్‌ను అందిస్తాయి. ఉచిత ఇంధనం, గిఫ్ట్ వోచర్‌లు, ట్రావెల్ రివార్డ్‌లు, క్యాష్‌బ్యాక్‌తో పాటు మరిన్నింటిని పొందడానికి రీడీమ్ చేయగల రివార్డ్ పాయింట్‌లను అందిస్తాయి. ఈ కార్డ్‌లు సర్‌ఛార్జ్ మినహాయింపులను కూడా అందిస్తాయి. వీటితో ప్రతి ఇంధన చెల్లింపులపై 1% నుంచి 2.5% వరకు ఆదా చేసుకోవచ్చు.

ముందుగా ఆఫర్‌లు, ప్రయోజనాలు, వడ్డీ రేటు, ఫీజులు, అర్హత ప్రమాణాలను సరిపోల్చడం ఉత్తమ మార్గం. ICICI బ్యాంక్, HPCL కోరల్, అమెరికన్ ఎక్స్‌ప్రెస్ క్రెడిట్ కార్డ్ ఇంధనం కొనుగోలుపై ప్రయోజనాలను అందిస్తున్నాయి. ఉదాహరణకు Indian Oil HDFC బ్యాంక్ క్రెడిట్ కార్డ్ దేశంలోని అన్ని ఇంధన పంపుల వద్ద గరిష్టంగా 50 రోజుల వడ్డీ రహిత వ్యవధిని, 1% ఇంధన సర్‌ఛార్జ్ మినహాయింపును అందిస్తుంది. కార్డు పొందిన మొదటి సంవత్సరంలో రూ.50,000 లేదా అంతకంటే ఎక్కువ ఖర్చు చేసే కస్టమర్లు మెంబర్‌షిప్ ఛార్జీలపై మినహాయింపును పొందవచ్చు.