Success Story: ఇంట్లో చిన్న గదిలో స్టార్ట్ అయిన బిజినెస్.. కేజీ ధర రూ.5 లక్షలు..

Saffron Farming Success: మనసులో సాధించాలి అనే కోరిక ఉంటే మనిషి ఎంత దూరం అయినా వేళతారు అనటానికి ఇదొక చక్కటి ఉదాహరణ. నేటి గాలంలో యువత రెగ్యులర్ జాబ్స్ మానేసి తమకు నచ్చిన పనిలో ఫుల్ ఫోకస్ పెడుతున్నారు. దాని ఫలితం జీతం కంటే వేల రెట్లు లాభాలను తెచ్చిపెడుతోంది. చిన్న స్థలంలో లక్షలు సాగుతో సంపాదించటం గురించి ఈ ఇద్దరు అన్నదమ్ముల సక్సెస్ స్టోరీ చూసి అందరం నేర్చుకోవచ్చు.

ఇప్పుడు మనం మాట్లాడుకోబోతున్నది నవీన్, ప్రవీణ్ సింధు అనే ఇద్దరు సోదరుల సక్సెస్ స్టోరీ గురించే. వారు తమ ఇంట్లోని చిన్న గదిలో ప్రపంచంలోనే అత్యంత ఖరీదైన మసాలా అయిన కుంకుమ పువ్వును పెంచి లక్షలు సంపాదిస్తున్నారు. వాస్తవానికి కుంకుమపువ్వుతో ఆరోగ్యానికి లెక్కలేనన్ని ప్రయోజనాలు ఉన్నాయి. దీనిని అనేక చర్మ సౌందర్య ఉత్పత్తుల తయారీ నుంచి శరీరానికి అవసరమైన పోషకాలను అందించడం వరకు అనేక ప్రయోజనాలను కలిగి ఉంది. గుండె ఆరోగ్యం, కంటి ఆరోగ్యం, మానసిక స్థితి మెరుగుదల, బరువు తగ్గడం మొదలైన ఔషధ గుణాలను కుంకుమపువ్వు కలిగి ఉంది.

దీనికి మార్కెట్లో ఉన్న డిమాండ్ తో పాటు ఆరోగ్య ప్రయోజనాలను వ్యాపార ఆలోచనగా మలచుకోవాలని ఎంటెక్ పూర్తి చేసిన ప్రవీణ్, హోటల్ మేనేజ్‌మెంట్ గ్రాడ్యుయేట్ నవీన్ నిర్ణయించుకున్నారు. దీంతో వాళ్లు సాంప్రదాయ పద్ధతుల్లో కాకుండా తమ ఇంటిలోని 225 చదరపు అడుగుల గదిలో ఆధునిక పద్ధతిని వినియోగించి సాగు చేయాలని నిర్ణయించుకున్నారు. ఇందుకోసం ప్రత్యేకంగా థాయ్‌లాండ్‌లో అధికారిక శిక్షణ పొందిన తర్వాత కశ్మీర్ నుంచి 100 కేజీల విత్తనాలను కొనుక్కొచ్చారు. అలా కేవలం 13 లక్షల పెట్టుబడితో తమ ఇంటిపైనే సాగుకు ఏర్పాట్లు చేసుకున్నారు.

కుంకుమపువ్వు పెరగడానికి 10-20 డిగ్రీల ఉష్ణోగ్రత అవసరం ఉంటుంది. అయితే ఈ అన్నదమ్ములు సూర్యరశ్మికి బదులు ఎల్‌ఈడీ లైట్లను ఉపయోగించి కృత్రిమంగా ఏర్పాటు చేసిన వాతావరణంలో వ్యవసాయం చేశారు. ఇందుకోసం వాళ్లు ఏరోపోనిక్ టెక్నాలజీని ఉపయోగించి కొన్ని నెలల్లోనే 1.5 కిలోల కుంకుమపువ్వును ఉత్పత్తి చేశారు. దీనిని ల్యాబ్ లో పండించిన అధిక నాణ్యత కలిగిన కుంకుమపువ్వుగా చెప్పి కేజీని రూ.5 లక్షలకు అమ్మటం స్టార్ట్ చేశారు. వాస్తవానికి భూమిపై న్యాచురల్‌గా పండించిన కుంకుమపువ్వుకు కేజీ ధర దాదాపు రూ.2.5 లక్షల నుంచి రూ.3 లక్షల వరకు ఉంటుంది. మార్కెట్లో ప్రజలు ప్రీమియం కుంకుమపువ్వు కొనుగోలుకు ఆసక్తి చూపటంతో వీరిద్దరి పంట పండింది.

సోదరులు కలిసి అమర్త్వ ఆగ్రో అనే పేరుతో తమ సొంత కుంకుమపువ్వు బ్రాండ్‌ను కూడా లాంచ్ చేశారు. ఆధునిక పద్ధతుల్లో చిన్న గదిలో పండించిన ఈ కుంకుమపువ్వును ప్రస్తుతం వారు అమెరికాతో పాటు యూకే వంటి అంతర్జాతీయ మార్కెట్‌లకు ఎగుమతి చేస్తున్నారు. పెద్ద కలలు నెరవేర్చుకోవటానికి చిన్న స్థలం ఉంటే సరిపోతుందని ఈ సోదరులు తమ తాజా విజయంతో నిరూపించారు.