Success Story: హర్షద్ మెహతా మోసంతో రోడ్డునపడ్డ ఫ్యామిలీ.. ప్రస్తుతం కోటీశ్వరులు..

Harshad Mehta Scam: ప్రస్తుతం అనేక మంది కొందరు చూపే అత్యాసలకు పోయి ఉన్న డబ్బు పోగొట్టుకుంటున్నారు. పైగా పెరిగిన టెక్నాలజీతో పాటుగానే ఆర్థిక మోసాలు సైతం కొత్త పుంతలు తొక్కుతూ అనేక మందికి నష్టాన్ని కలిగిస్తున్నాయి.

అయితే వీటన్నింటి కంటే ముందరే 1990ల దశకంలో జరగిన హర్షద్ మెహతా స్కామ్ అతిపెద్దదిగా మార్కెట్లలో ఇప్పటికీ చెప్పుకుంటుంటారు. 1992లో దేశాన్ని కుదిపేసిన స్టాక్ బ్రోకర్ హర్షద్ మెహతా కుంభకోణంలో భారీ మొత్తంలో డబ్బు పోగొట్టుకున్న వారిలో జార్ఖండ్‌కు చెందిన వ్యాపారవేత్త తుషార్ జైన్, అతని తండ్రి మూల్‌చంద్ జైన్ కూడా ఉన్నారు.

మెహతా కుంభకోణంతో క్షీణించిన ఆర్థిక పరిస్థితి కారణంగా వీరు తమ కుంటుంబ పోషనకు ముంబై వీధుల్లో హ్యాండ్‌బ్యాగ్‌లను అమ్మారు. విరామం లేని కృషితో 1999లో హై స్పిరిట్ కమర్షియల్ వెంచర్స్‌ను ప్రారంభించారు. తర్వాతి కాలంలో దానిని 300 స్టోర్లకు విస్తరించి చివరగా ముంబైలో స్థిరపడ్డారు. 2006 వారి వ్యాపారం భారీగా కస్టమర్లను పొందింది. అలా కస్టమర్ల కోరిక మేరకు డిజైనర్ బ్యాగులు తయారు చేస్తారు. 2007లో వారు తమ వ్యాపారాన్ని మరింత అభివృద్ధి చేసుకున్నారు మరియు రోజుకు 3,000-4,000 బ్యాగ్‌లను ఉత్పత్తి చేసే కర్మాగారాలను స్థాపించారు.

ప్రస్తుతం కంపెనీకి మేనేజింగ్ డైరెక్టర్‌గా ఉన్న తుషార్.. 2017లో Traworld, Hashtag బ్రాండ్లను ప్రవేశపెట్టారు. ఆ తర్వాత వారు ట్రావరల్డ్ బ్రాండ్ అంబాసిడర్‌గా సోనమ్ కపూర్ అహుజాతో ఒప్పందం కుదుర్చుకున్నారు. దేశంలో కంపెనీ ప్రస్తుతం నాలుగో అతిపెద్ద రిటైల్ సంస్థగా గుర్తింపును పొందింది. 2017లో కంపెనీ రోజుకు 30,000-35,000 బ్యాగ్స్ తయారు చేయటంతో వ్యాపారం రూ.250 కోట్లకు చేరుకుంది.

ముంబై కేంద్రంగా పనిచేస్తున్న కంపెనీకి దేశవ్యాప్తంగా 10 ప్రాంతీయ కార్యాలయాలు ఉన్నాయి. రానున్న 5 ఏళ్ల కాలంలో వ్యాపార ఆదాయన్ని రూ.1,000 కోట్లకు చేర్చాలని తుషార్ ప్లాన్ చేస్తున్నారు. ఈ క్రమంలో ఏడాదికి 25 లక్షల యూనిట్లను ఉత్పత్తి చేయాలని యోచిస్తున్నారు.