Budget 2024: సొంతింటి కల నెరవేరుతుందా..? బడ్జెట్‌పై రియల్టీ రంగం కోటి ఆశలు..

Realty Sector: నైట్ ఫ్రాంక్ ఇండియా, అనరాక్‌ల ఇటీవలి రియల్ ఎస్టేట్ నివేదికలు ఈ రంగంలో బూమ్ గురించి వివరించాయి. కొవిడ్ కాలంలో ఎదురుదెబ్బ తగిలిన రియల్ ఎస్టేట్ రంగం ఇప్పుడు పుంజుకుంది. హైదరాబాద్, దిల్లీ, ముంబై సహా దేశంలోని 8 ప్రధాన నగరాల్లో ఇళ్ల విక్రయాలు 10 ఏళ్ల రికార్డును బద్దలు కొట్టాయి. అయితే ఎన్నికల వేళ బడ్జెట్లో ప్రకటనపై ఈ రంగం ఆసక్తిగా ఎదురుచూస్తోంది.

రియల్ ఎస్టేట్ డెవలపర్లు ప్రభుత్వం నుంచి 4 ప్రధాన అంచనాలను కలిగి ఉన్నారు. ఈ రంగం మరింత బలంగా అభివృద్ధి చెందుతుందని భావిస్తున్నారు. దేశ ఆర్థిక వ్యవస్థలో రియల్‌ ఎస్టేట్‌ రంగం కీలకపాత్ర పోషించడమే దీనికి కారణం. పెరుగుతున్న ఇళ్ల విక్రయాలు సిమెంట్, స్టీల్, ఇటుకలు, ఎలక్ట్రానిక్స్ వంటి ఇతర వస్తువుల అమ్మకాలు పెరగటమే కాక ఉపాధి అవకాశాల సృష్టి జరుగుతుందని వినియోగదారులు చెబుతున్నారు.

1) రియల్ ఎస్టేట్ రంగానికి పరిశ్రమ హోదా కల్పించాలనే డిమాండ్ చాలా రోజులుగా ఉంది. CREDAI-NCR చైర్మన్, గౌర్ గ్రూప్ CMD మనోజ్ గౌర్ మాట్లాడుతూ.. దేశ ఆర్థిక వృద్ధిలో రియల్ ఎస్టేట్ ముఖ్యమైన పాత్ర పోషిస్తుందన్నారు. హోదా అతిపెద్ద డిమాండ్‌గా ఉంది.

2) రియల్ ఎస్టేట్ రంగంలో డిమాండ్ పెంచేందుకు గృహ కొనుగోలుదారులకు నిబంధనలను సులభతరం చేయడానికి, అధిక రెపో రేట్లు గృహ రుణాలను ఖరీదైనవిగా మారుస్తున్నాయి. ఇలాంటి పరిస్థితిలో ప్రభుత్వం పన్ను మినహాయింపులను అందిస్తే తప్ప రియల్టీ రంగం అభివృద్ధి చెందదని నిపుణులు ప్రభుత్వాన్ని కోరుతున్నారు. మొత్తం అమ్మకాలలో రూ. 1 కోటి కంటే ఎక్కువ ధర ఉన్న ఇళ్ల వాటా 2022లో 27% నుండి 2023లో 34%కి పెరిగింది. అలాగే, మొత్తం గృహాల విక్రయాల్లో అఫర్డబుల్ హౌసింగ్ వాటా 30%కి తగ్గింది. సెక్షన్ 24 కింద రుణాలపై పన్ను మినహాయింపు రూ.5 లక్షలకు పొడిగించాలని డిమాండ్ ఉంది.

3) హౌసింగ్ డిమాండ్ నానాటికీ పెరుగుతోంది. నయన్ రహేజా ప్రకారం సరసమైన గృహాలపై ప్రభుత్వం కొన్ని ఉపశమనాలు ప్రకటిస్తే బాగుంటుందన్నారు. ప్రజలకు అందుబాటు ధరలో ఇళ్లను అందించేందుకు ప్రభుత్వం ఈ బడ్జెట్‌లో కొన్ని పథకాలను ప్రకటించాలని నిపుణులు ఆశాభావం వ్యక్తం చేశారు. సరసమైన గృహాలపై GST రేటు 1%, అయితే ఈ కేటగిరీ వెలుపలి గృహాలపై 5% GST వర్తిస్తుంది. ఈ రెండు షరతులను మార్చాలని రియల్ ఎస్టేట్ డెవలపర్లు డిమాండ్ చేస్తున్నారు.

4) రియల్టీ రంగానికి సింగిల్ విండో క్లియరెన్స్ కోసం ప్రభుత్వం కృషి చేయాలి. అదే జరిగితే ఈ రంగానికి పెద్ద ఊపు వస్తుంది. దీంతో రియల్ ఎస్టేట్ డెవలపర్లు అనుమతుల కోసం ఎక్కువ సమయాన్ని వృథా చేయాల్సిన అవసరం ఉండదు. మిగిలిన సమయాన్ని ప్రాజెక్ట్ నిర్మాణంలో, కొనుగోలుదారులకు సకాలంలో డెలివరీ చేయడానికి ఉపయోగించుకోవచ్చని వారు భావిస్తున్నారు.