Loan Offer: 5 శాతం వడ్డీకే రూ.3 లక్షలు లోన్.. మోదీ ప్రభుత్వ స్కీమ్ వివరాలు..

Low Coat Loans: దేశంలోని అన్ని వర్గాల వారికి తక్కువ వడ్డీ రేట్లకు అవసరమైన రుణాలను అందించాలని చాలా కాలంగా కేంద్రంలోని ఎన్డీయే ప్రభుత్వం అనేక పథకాలను తీసుకొస్తోంది. ఇవి ప్రజలను సొంత కాళ్లపై నిలబడి ఉపాధిని పొందేందుకు వీలు కల్పిస్తున్నాయి.

ఇప్పుడు మనం మాట్లాడుకోబోతున్నది ప్రధానిగా నరేంద్ర మోదీ రెండవ టర్మ్‌లో అధికారంలో ఉన్నప్పుడు పేద వర్గాలకు నేరుగా ప్రయోజనం కలిగించే అనేక స్కీమ్స్ తీసుకొచ్చారు. వాటిలో ప్రజలను ప్రస్తుతం ఆకట్టుకుంటున్న పీఎం విశ్వకర్మ స్కీమ్ గురించే. దీనిని ప్రధాని మోదీ సెప్టెంబర్ 17, 2023న ప్రకటించారు. ఇప్పటి వరకు ఈ స్కీమ్ కింద లబ్ధి పొందేందుకు దాదాపు 13 లక్షల మంది నమోదు చేసుకున్నట్లు గణాంకాలు చెబుతున్నాయి.

చేతులు, పనిముట్లతో పనిచేసే చేతివృత్తుల వారితో సహా 18 వ్యాపారాలు ఈ స్కీమ్ పరిధిలో చేర్చబడ్డాయి. దీనికింద వడ్రంగులు, పడవ తయారీదారులు, ఆయుధ తయారీదారులు, కమ్మరి, పనిముట్లను తయారు చేసేవారు, తాళాలు వేసేవారు, స్వర్ణకారులు, కుమ్మరులు, శిల్పులు, రాళ్లను విరగొట్టేవారు ఉన్నారు. అలాగే చెప్పులు కుట్టేవారు, మేస్త్రీలు, బుట్టలు అల్లేవారు, సాంప్రదాయం బొమ్మల తయారీదారులు, బార్బర్‌లు, దండలు తయారు చేసేవారు, చాకలివారు, టైలర్లు, ఫిషింగ్ వల తయారీలో ఉన్న వారికి స్కీమ్ వర్తిస్తుంది.

గతంలో మోదీ ప్రకటించిన ప్రధానమంత్రి విశ్వకర్మ యోజన కింద అర్హులైన చేతిపనుల వారు రూ.3 లక్షల వరకు రుణాన్ని పొందవచ్చు. ఇక్కడ విశేషం ఏమిటంటే రుణం ఎలాంటి పూచీకత్తు లేకుండా ఇవ్వబడుతుంది. లోన్ 18 నెలలు, 30 నెలల కాలవ్యవధికి 5 శాతం స్థిర రాయితీ వడ్డీ రేటుతో రూ.లక్ష, రూ.2 లక్షలు అనే రెండు విడతలుగా అందించబడుతుంది. ముందుగా ప్రాథమిక శిక్షణ పూర్తి చేసుకున్న లబ్ధిదారులు రూ.లక్ష వరకు తొలి విడత రుణ సహాయాన్ని అందుకునేందుకు అర్హులు. దీనికి సక్రమంగా చెల్లింపులు చేపట్టే లబ్ధిదారులు రెంవడ విడత రుణాన్ని పొందవచ్చు. ఇక్కడ సదరు వ్యక్తులు తమ వ్యాపారంలో డిజిటల్ లావాదేవీలను అనుసరించటం తప్పనిసరని గుర్తుంచుకోవాలి.

పీఎం విశ్వకర్మ యోజన కింద రుణం పొందటానికి సంబంధించిన పూర్తి మార్గదర్శకాలను ఎవరైనా pmvishwakarma.gov.in వెబ్‌సైట్‌లో చూడవచ్చు. అలాగే పథకానికి సంబంధించిన ఏదైనా సమాచారం కోసం ఉచిత హెల్ప్‌లైన్ నంబర్ మీరు 18002677777కి కాల్ చేయవచ్చు. అలాగే [email protected] ఈమెయిల్ ద్వారా కూడా సమాచారాన్ని అభ్యర్థించవచ్చు.