రెగ్యులర్ Fixed Depositsపై 8.50 శాతం వడ్డీ.. ఈ నాలుగు బ్యాంకులు బెటర్..

Fixed Deposits: దేశంలో ద్రవ్యోల్బణం కట్టడి చర్యల్లో భాగంగా రెపో రేట్లను రిజర్వు బ్యాంక్ పెంచటంతో ఫిక్స్‌డ్ డిపాజిట్ల రేట్లను బ్యాంకులు పెంచాయి. ఈ క్రమంలో కొన్ని బ్యాంకులు సాధారణ డిపాజిటర్లకు 8.50 శాతం కంటే ఎక్కువ వడ్డీని ఆఫర్ చేస్తున్నాయి.

ముందుగా యూనిటీ స్మాల్ ఫైనాన్స్ బ్యాంక్ సాధారణ డిపాజిటర్లకు అత్యధిక వడ్డీ రేటును ఆఫర్ చేస్తోంది. ఇది 1001 రోజుల కాలానికి 9 శాతం వడ్డీని అందిస్తోంది. అలాగే బ్యాంక్ 501 రోజులకు 8.75 శాతం, ఆరు నెలల నుంచి 201 రోజులకు 8.75 శాతం, 3 నుంచి 5 ఏళ్ల కాలానికి 8.25 శాతం వడ్డీని చెల్లిస్తోంది. సాధారణంగా వాణిజ్య బ్యాంకుల కంటే స్మాల్ ఫైనాన్స్ బ్యాంకులు పొదుపరులకు కొంత ఎక్కువ వడ్డీ రేట్లను ఆఫర్ చేస్తుంటాయి.

జన స్మాల్ ఫైనాన్స్ బ్యాంక్ సైతం సాధారణం డిపాజిటర్లకు మంచి వడ్డీ రేట్లను అందుబాటులో ఉంచింది. 366 రోజుల నుంచి 499 రోజులకు చేసే ఫిక్స్‌డ్ డిపాజిట్లపై 8.50 శాతం వడ్డీ రేటును అందిస్తోంది. 501 రోజుల నుంచి 2 ఏళ్ల కాలానికి 8.50 శాతం వడ్డీని ఆఫర్ చేస్తోంది.

ఇదే క్రమంలో ఉజ్జీవ్ స్మాల్ ఫైనాన్స్ బ్యాంక్ నుంచి ఫిక్స్‌డ్ డిపాజిట్లపై సాధారణ డిపాజిటర్లు పొందగలిగే గరిష్ఠ వడ్డీ రేటు 8.25%గా ఉంది. అలాగే సీనియర్ సిటిజన్లకు బ్యాంక్ 8.75 శాతం వడ్డీని అందిస్తోంది. ప్లాటినం ఇన్వెస్ట్మెంట్ స్కీమ్ కింద కనీస పెట్టుబడి రూ.15 లక్షలు చేసేవారికి బ్యాంక్ ప్రత్యేకంగా 8.75 శాతం వడ్డీని ఆఫర్ చేస్తోంది.

ఈక్విటాస్ స్మాల్ ఫైనాన్స్ బ్యాంక్ సైతం సాధారణ పెట్టుబడిదారులకు మంచి వడ్డీ రేట్లను ఆఫర్ చేస్తోంది. బ్యాంక్ 444 రోజులకు చేసే ఫిక్స్‌డ్ డిపాజిట్లపై 8.50 వడ్డీని అందిస్తోంది. అలాగే ఏడాది నుంచి 443 రోజులకు చేసే డిపాజిట్లపై 8.20 శాతం వడ్డీని, రెండు సంవత్సరాల ఒక్క రోజు నుంచి 887 రోజులకు చేసే డిపాజిట్లపై 8 శాతం వడ్డీని, 445 రోజుల నుంచి 18 నెలలకు చేసే డిపాజిట్లపై 8.20 శాతం వడ్డీని బ్యాంక్ అందిస్తోంది. స్మాల్ ఫైనాన్స్ బ్యాంకులు రిజర్వ్ బ్యాంక్ ఆఫ్ ఇండియాచే ఆథరైజ్డ్ షెడ్యూల్డ్ కమర్షియల్ బ్యాంకులు కాబట్టి రూ.5 లక్షల వరకు చేసే డిపాజిట్లపై ఇన్సూరెన్స్ కవరేజ్ కూడా లభిస్తుంది.