క్రెడిట్ కార్డ్ పోర్టబిలిటీ అంటే తెలుసా..? కొత్త సౌలభ్యం ప్రయోజనాలు ఇవే..

Credit Card Portability: కొత్త డిజిటల్ సేవలు విస్తరిస్తున్న వేళ.. రిజర్వు బ్యాంక్ వినియోగదారులకు సౌకర్యాన్ని పెంచేందుకు ప్రయత్నిస్తోంది. కార్డు వినియోగదారుల కోసం నయా సర్వీస్ ప్లాన్ చేస్తోంది.

డెబిట్, క్రెడిట్, ప్రీపెయిడ్ కార్డ్‌ల జారీపై రిజర్వు బ్యాంక్ ఆఫ్ ఇండియా డ్రాఫ్ట్ సర్క్యులర్‌ను జారీ చేసింది. ఇందులో కస్టమర్‌లు వారి జారీ చేసే బ్యాంక్ లేదా ఫైనాన్స్ కంపెనీలతో కొనసాగడానికి బదులుగా వారు కోరుకున్న కార్డ్ నెట్‌వర్క్ కు మారేందుకు వెసులుబాటు కలగనుంది. ఈ ఎంపికను వినియోగదారులు జారీ చేసే సమయంలో లేదా తర్వాత ఉపయోగించుకోవచ్చని RBI స్పష్టం చేసింది.

ఉదాహరణకు వీసా, మాస్టర్ కార్డ్, రూపే వంటి కార్డ్ జారీదారులు ఒకటి కంటే ఎక్కువ కార్డ్ నెట్‌వర్క్‌లలో కార్డ్‌లను జారీ చేస్తారు. బహుళ కార్డ్ నెట్‌వర్క్‌లలో దేనినైనా ఎంచుకోవడానికి వినియోగదారులకు ఆప్షన్ అందించాలని సెంట్రల్ బ్యాంక్ యోచిస్తున్నట్లు డ్రాఫ్ట్ సర్క్యులర్‌ ద్వారా వెల్లడైంది. ప్రతిపాదిత నియమాలు క్రెడిట్, డెబిట్, ప్రీపెయిడ్ కార్డ్‌లను జారీ చేసే బ్యాంకులు, నాన్-బ్యాంకింగ్ ఫైనాన్షియల్ కంపెనీలకు వర్తిస్తాయని సెంట్రల్ బ్యాంక్ పేర్కొంది.

దీని ప్రకారం అక్టోబరు 1, 2023 నుంచి కార్డులు జారీ చేసే సంస్థలు తమ కస్టమర్లకు నచ్చిన నెట్‌వర్క్‌ను ఎంచుకునే అవకాశాన్ని కల్పించాలని ఆర్‌బీఐ ప్రతిపాదించింది. తద్వారా ఒక నెట్‌వర్క్ నుంచి మరొక నెట్‌వర్క్‌కు వినియోగదారులు మారవచ్చు. ప్రస్తుతం దేశంలో కార్డు వినియోగదారులు వీసా, మాస్టర్ కార్డ్, రూపే, అమెరికన్ ఎక్స్‌ప్రెస్, డైనర్స్ క్లబ్ నెట్‌వర్క్‌లకు యాక్సెస్ కలిగి ఉన్నారు. తాజా ముసాయిదా పోటీతత్వాన్ని పెంచటానికి తోడ్పడనుంది. అయితే ఆగస్టు 4లోగా వాటాదారుల అభిప్రాయాన్ని ఆహ్వానిస్తామని ఆర్‌బీఐ తెలిపింది.

ఏప్రిల్ 2023 నాటికి బ్యాంకులు 8.65 కోట్ల క్రెడిట్ కార్డులను జారీ చేశాయి. RBI డేటా ప్రకారం క్రెడిట్ కార్డ్ బకాయిలు రూ.2 లక్షల కోట్లకు పెరిగాయి. నెలవారీ క్రెడిట్ చెల్లింపులు ప్రతి నెలా రూ.1 లక్ష కోట్లకు పైగా ఉన్నాయి. ఏప్రిల్ 2023 నెలలో కార్డ్ చెల్లింపులు రూ. 1.32 లక్షల కోట్లకు చేరుకున్నాయి.