Congestion Tax: వాహనదారులకు మరో కొత్త ట్యాక్స్.. ఈ రోడ్లెక్కితే చాలు బాదుడే బాదుడు..

Congestion Tax: ఇప్పటివరకు ఆదాయపు పన్ను, ఇంటిపన్ను గురించి అందరూ వింటూనే ఉన్నాం. ఇటీవలే కొన్ని రాష్ట్ర ప్రభుత్వాలు చెత్త పన్నును సైతం ప్రజలపై మోపాయి. తాజాగా వినియోగదారుల నడ్డి విరిచేందుకు మరో ట్యాక్స్‌ను ప్రవేశపెట్టడానికి ఓ రాష్ట్రం తహతహలాడుతోంది.

శరవేగంగా అభివృద్ధి చెందుతున్న ఢిల్లీ, బెంగళూరు, హైదరాబాద్ వంటి నగరాలకు ట్రాఫిక్ సమస్య పెద్ద తలనొప్పిగా మారింది. వాహనాల రద్దీ దృష్ట్యా ఎంతో విలువైన సమయం ట్రాఫిక్‌లో దుర్వినియోగమవుతోంది. దీని పరిష్కారానికి బెంగళూరు మెట్రోపాలిటన్ ట్రాన్స్‌ పోర్ట్ కార్పొరేషన్(BMTC) రంగంలోకి దిగింది. ఇందుకోసం రద్దీపన్ను విధించాలని భావిస్తోంది.

బెంగళూరులో రోజూ 12 మిలియన్ల వాహనాలు ప్రవేశిస్తున్నట్లు అంచనా. ఫలితంగా ట్రాఫిక్ జామ్ అయి గంటకు దాదాపు 2.8 లక్షల లీటర్ల ఇంధనంతో పాటు ఏటా 60 కోట్ల పనిగంటలు వృథా అవుతున్నాయి. దీనిని కట్టడి చేసేందుకు ట్రాఫిక్ వేళల్లో గుర్తించిన 9 రోడ్లపై రద్దీ పన్ను విధించాలని "కర్ణాటక డికేడ్ - రోడ్‌మ్యాప్ టు $1 ట్రిలియన్ ఎకానమీ" అనే నివేదిక సిఫార్సు చేసింది.

ఔటర్ రింగ్ రోడ్ (ORR), సర్జాపూర్ రోడ్, హోసూర్ రోడ్, ఓల్డ్ ఎయిర్‌పోర్ట్ రోడ్, ఓల్డ్ మద్రాస్ రోడ్, బళ్లారి రోడ్, బన్నెరఘట్ట రోడ్, కనకపుర రోడ్, మగడి రోడ్, వెస్ట్ ఆఫ్ కార్డ్ రోడ్ మరియు తుమకూరు రోడ్లపై రద్దీ పన్నులు వసూలు చేయాలని BMTC భావిస్తోంది. తద్వారా ప్రైవేట్ వాహనాల వినియోగాన్ని తగ్గిస్తూ, ప్రజా రవాణాను ప్రోత్సహించాలని భావిస్తోంది. ఇందుకోసం ఫాస్ట్‌ట్యాగ్ సిస్టమ్‌ను ఉపయోగించేలా అధికారులు ప్లాన్ చేస్తున్నారు.

సమయానుగుణంగా నిర్ధిష్ట ప్రాంతాల్లోకి ప్రవేశించిన వాహనాలపై ఈ రద్దీ పన్ను విధిస్తారు. ట్రాఫిక్ కట్టడితో పాటు వాయు కాలుష్యం తగ్గింపు కోసం ఇది ఉపయోగపడుతుంది. మన దేశంలో దీనిపై వ్యతిరేకత ఉన్నప్పటికీ.. లండన్, స్టాక్ హోమ్, సింగపూర్ వంటి పలు అంతర్జాతీయ నగరాలు విజయవంతంగా అమలు చేస్తున్నాయి. ఇదే వ్యవస్థ భవిష్యత్తులో దేశంలోని ఇతర నగరాలకూ విస్తరించవచ్చని భావిస్తున్నారు.