కర్ణాటకలో SBI బ్యాంకుని ఊడ్చిపడేసిన దొంగలు.. రూ. 21 కోట్ల విలువైన బంగారం, నగదుతో పరార్

కర్ణాటక రాష్ట్రంలో విజయపుర జిల్లా చడచన్ పట్టణంలోని స్టేట్ బ్యాంక్ ఆఫ్ ఇండియా (SBI) బ్రాంచ్‌ లో దొంగల ముఠా భారీ దొంగతనానికి పాల్పడింది. ఈ ఘటనలో ఐదు నుండి ఆరుగురు వ్యక్తులు సైనిక దుస్తులు ధరించి ముసుగులు వేసుకొని బ్యాంక్‌ లోకి ప్రవేశించారు. దొంగల ముఠా దొంగతనానికి ముందుగా వేసుకున్న ప్లాన్ ప్రకారం.. దేశీయ పిస్టోళ్లు, పదునైన ఆయుధాలతో బ్యాంక్‌లోకి ప్రవేశించారు. బ్యాంకు మేనేజర్, క్యాషియర్, ఇతర సిబ్బందిని ఓ మూల గదిలో బంధించి, తమ దోపిడీ కార్యకలాపాలను సులభతరం చేసుకున్నారు.

దొంగలు ప్రధానంగా బంగారు ఆభరణాలు, అలాగే కొంతమంది నగదు మొత్తాన్ని దోచుకున్నారు. అయితే ఇప్పటివరకు సంపూర్ణంగా ఎంత విలువైన వస్తువులు దోచుకున్నారో స్పష్టంగా తెలియడం లేదు.
ప్రస్తుతానికి మీడియా, పోలీసులు అందిస్తున్న సమాచారం ప్రకారం.. దొంగల ముఠా రూ. 21 కోట్ల విలువైన బంగారు, నగదు తీసుకెళ్లినట్లుగా అనుమానిస్తున్నారు. ఈ దోపిడీ జరిగిన వెంటనే బ్యాంకు సిబ్బంది పోలీసులకు సమాచారం అందించారు. పోలీసులు సంఘటనాస్థలానికి చేరుకొని దర్యాప్తు ప్రారంభించారు.

ముఖ్యంగా బ్యాంక్‌లో ఉన్న సీసీటీవీ ఫుటేజ్‌ను పరిశీలించి, దొంగల ముఠాను గుర్తించడానికి ప్రయత్నిస్తున్నారు.ప్రాథమిక దర్యాప్తులో, దొంగలు సైనిక దుస్తులు ధరించి వచ్చినందున గుర్తింపు కష్టం అని పోలీసు అధికారి తెలిపారు.అయితే, ఫుటేజ్ ద్వారా వారు ఎక్కడి నుంచి వచ్చారు, ఎక్కడికి వెళ్లారు అనే దానిపై ముందస్తు అనుమానాలు సేకరిస్తున్నారు. ఈ ఘటనపై కేసు నమోదు చేసుకొని, పోలీసులు విచారణ చేపట్టారు.

దొంగతనం ఎలా జరిగింది? సాయంత్రం 6:20 గంటల సమయంలో ముసుగు ధరించిన యువకుడు కస్టమర్‌గా నటించి బ్యాంక్‌లోకి ప్రవేశించాడు. ఆయన కరెంట్ అకౌంట్ ఓపెనింగ్ ఫారమ్‌ను సరిచేయమని అడిగి సిబ్బందిని మోసం చేశాడు.కొన్ని నిమిషాల తర్వాత, ఆయుధాలతో అతను తిరిగి వచ్చి సిబ్బందిని బెదిరించాడు. ఇంతలో మరో ఇద్దరు ముఠా సభ్యులు ఆయుధాలతో చేరి, ఖజానా, బంగారు లాకర్లు తెరవమని బలవంతం చేశారు.దొంగలు.. సిబ్బంది, కస్టమర్లను ప్లాస్టిక్ ట్యాగ్‌లతో కట్టివేసి రూ. 1.04 కోట్ల నగదుతో పాటుగా సుమారు రూ.20 కోట్ల విలువైన 20 కిలోల బంగారు ఆభరణాలను దోచుకున్నారు.
ఖచ్చితమైన మొత్తం బ్యాంకు సిస్టమ్ అప్‌డేట్ అయిన తర్వాత స్పష్టం అవుతుంది.

ఈ దొంగల ముఠా నకిలీ రిజిస్ట్రేషన్ ప్లేట్ ఉన్న సుజుకి EVA కారును ఉపయోగించి మహారాష్ట్ర పంధర్‌పూర్ వైపు పారిపోయారు. పంధర్‌పూర్ దగ్గర హుల్జంతి గ్రామంలో వారి వాహనం ద్విచక్ర వాహనాన్ని ఢీకొట్టి గొడవ రేకెత్తించారు. అయితే, దోపిడీ వస్తువుతో మళ్ళీ గమ్యం వైపు పారిపోయారు. కర్ణాటక పోలీసు సూపరింటెండెంట్ లక్ష్మణ్ నింబార్గి, సీనియర్ అధికారులు సంఘటనాస్థలానికి చేరుకుని దర్యాప్తు ప్రారంభించారు.కర్ణాటక-మహారాష్ట్ర సరిహద్దు ప్రాంతం అంతటా భద్రతను కట్టుదిట్టం చేశారు. సీసీటీవీ ఫుటేజ్, నకిలీ రిజిస్ట్రేషన్ ప్లేట్ వివరాలు ఆధారంగా ముఠాను పట్టుకోవడానికి ప్రయత్నిస్తున్నారు.