Bengaluru: ఇక మీ ఇంటికి లీగల్ గుర్తింపు.. కర్ణాటక క్యాబినెట్ సంచలన నిర్ణయం! A-Khata ప్రాసెస్ ఇదే!

మీకు బెంగళూరు (Bengaluru) లేదా కర్ణాటకలోని ఇతర పట్టణ ప్రాంతాల్లో ఆస్తి ఉందా? అది B-Khata (బి-ఖాతా) పరిధిలో ఉండి.. లోన్ రాకనో లేదా అమ్మడం కుదరకనో ఇబ్బంది పడుతున్నారా? అయితే మీకో శుభవార్త! అక్రమ లేఅవుట్‌లలో ఉన్న ప్రాపర్టీలను కూడా క్రమబద్ధీకరిస్తూ.. వాటికి A-Khata ఇచ్చేందుకు కర్ణాటక ప్రభుత్వం గ్రీన్ సిగ్నల్ ఇచ్చింది.

క్యాబినెట్ నిర్ణయం ఏమిటి?

ముఖ్యమంత్రి సిద్ధరామయ్య అధ్యక్షతన జరిగిన క్యాబినెట్ సమావేశంలో జనవరి 8న ఒక కీలక నిర్ణయం తీసుకున్నారు. పట్టణ స్థానిక సంస్థల పరిధిలోని అనధికారిక లేఅవుట్‌లలో నిర్మించిన ఇళ్లు, అపార్ట్‌మెంట్‌ లు, ఫ్లాట్‌లకు B-Khata స్థానంలో A-Khata సర్టిఫికేట్‌లను జారీ చేయాలని ప్రభుత్వం నిర్ణయించింది. ఈ విషయాన్ని రాష్ట్ర న్యాయ శాఖ మంత్రి హెచ్. కె. పాటిల్ స్వయంగా వెల్లడించారు.

అసలు ఈ A-Khata, B-Khata అంటే ఏమిటి?

సాధారణంగా కర్ణాటకలో 'ఖాతా' అనేది మున్సిపల్ అధికారులు నిర్వహించే ఒక ఆస్తి రికార్డు.

• A-Khata: ప్రభుత్వ నిబంధనల ప్రకారం. అనుమతి పొందిన లేఅవుట్‌లలో కట్టిన ప్రాపర్టీలకు ఇచ్చేది. ఇది పూర్తి చట్టబద్ధమైనది.
• B-Khata: అనుమతులు లేని లేఅవుట్‌ లు లేదా ప్లాన్ అప్రూవల్ లేకుండా కట్టిన నిర్మాణాలకు ఇచ్చే ట్యాక్స్ రికార్డు. ఇది కేవలం పన్ను కట్టడానికి మాత్రమే పనికొస్తుంది. కానీ, దీనికి పూర్తి లీగల్ హోదా ఉండదు.

ఈ నిర్ణయం వల్ల మీకు కలిగే లాభాలేంటి?

ఇప్పటివరకు బెంగళూరు (Bengaluru), ఇతర పట్టణాలలోని వేలాది మంది ప్రాపర్టీ యజమానులు B-Khata వల్ల ఎన్నో ఇబ్బందులు పడ్డారు. ఇప్పుడు A-Khata రావడం వల్ల మీకు ఈ క్రింది ప్రయోజనాలు కలుగుతాయి..

1. బ్యాంక్ లోన్లు: A-Khata ఉంటేనే బ్యాంకులు సులభంగా లోన్లు ఇస్తాయి.
2. అమ్మకాలు సులభం: ఆస్తిని అమ్మేటప్పుడు ఎలాంటి లీగల్ ఇబ్బందులు ఉండవు, మార్కెట్ విలువ కూడా పెరుగుతుంది.
3. ట్రేడ్ లైసెన్స్: వ్యాపారాలు చేసుకోవడానికి అవసరమైన లైసెన్స్‌ లు సులభంగా లభిస్తాయి.
4. లీగల్ భరోసా: మీ ఇల్లు లేదా ప్లాట్ ఇప్పుడు ప్రభుత్వ రికార్డుల్లో పూర్తి చట్టబద్ధమైనదిగా గుర్తింపు పొందుతుంది.

ఎవరికి ఈ అవకాశం వర్తిస్తుంది?

కర్ణాటక టౌన్ అండ్ కంట్రీ ప్లానింగ్ యాక్ట్ కింద ఈ మార్పులు జరగనున్నాయి. గతంలో బెంగళూరు మహానగర పాలిక (BBMP) పరిధిలో సెప్టెంబర్ 30, 2024 లోపు జారీ చేసిన B-Khata లకు మాత్రమే ఇది వర్తిస్తుందని గతంలోనే స్పష్టం చేశారు. ఇప్పుడు రాష్ట్రవ్యాప్తంగా ఉన్న అర్బన్ లోకల్ బాడీస్ పరిధిలోకి దీనిని విస్తరించడం విశేషం.

కోర్టు చిక్కులు లేవు!

ఈ నిర్ణయంపై మంత్రి హెచ్. కె. పాటిల్ మాట్లాడుతూ.. "ఇది ఒక పాలసీ నిర్ణయం. దీనిపై ఎలాంటి కోర్టు స్టే ఆర్డర్లు లేవు. అందుకే ప్రజల హితం కోసం ప్రభుత్వం ముందుకు వెళ్తోంది" అని క్లారిటీ ఇచ్చారు. అనధికారిక లేఅవుట్ల వల్ల లక్షలాది మంది సామాన్యులు పడుతున్న ఇబ్బందులకు ఈ నిర్ణయంతో చెక్ పడనుంది.

మీకు కూడా బెంగళూరు (Bengaluru) లేదా కర్నాటకలోని ఇతర పట్టణాల్లో ఆస్తి ఉండి.. ఒకవేళ B-Khata తో ఇబ్బంది పడుతుంటే.. వెంటనే మీ స్థానిక మున్సిపల్ కార్యాలయంలో ఈ అప్‌గ్రేడ్ ప్రాసెస్ గురించి వివరాలు తెలుసుకోండి!