IPO News: గూబ గుయ్‌ అనిపించిన ఐపీవో.. తొలిరోజే ఇన్వెస్టర్లకు షాక్..

JG Chemicals IPO: నేడు మార్కెట్లోకి వచ్చిన రెండు ఐపీవోలు ఇన్వెస్టర్లను పూర్తిగా నిరాశకు గురిచేశాయి. ఒకదాని తర్వాత మరొక కంపెనీ జాబితాను చూసిన పెట్టుబడిదారులు కంగారుపడుతున్నారు.

ఇప్పుడు మనం మాట్లాడుకోబోతున్నది జేజీ కెమికల్స్ ఐపీవో గురించే. కంపెనీ షేర్లు నేడు ఎన్ఎస్ఈ, బీఎస్ఈలలో జాబితాకు నేడు మార్కెట్లలోకి అడుగుపెట్టాయి. అయితే బలహీనమైన లిస్టింగ్ ఇన్వెస్టర్లను నిరాశకు గురిచేసింది. షేర్లు 4.52% తగ్గింపుతో బీఎస్‌ఈలో రూ.211 వద్ద లిస్ట్ కాగా.. ఎన్ఎస్ఈలో 5.43% తక్కువగా రూ.209 వద్ద జాబితా చేయబడింది. JG కెమికల్స్ ఐపీవో ప్రైస్ బ్యాండ్ ఒక్కో షేరుకు రూ.210-221గా ప్రకటించిన సంగతి తెలిసిందే. లిస్టింగ్ తర్వాత కూడా కంపెనీ షేర్లు బీఎస్ఈలో 9 శాతం మేర పతనమై రూ.201 వద్ద ట్రేడింగ్ కొనసాగిస్తున్నాయి.

మూడు రోజుల బిడ్డింగ్ ప్రక్రియలో జేజీ కెమికల్స్ ఐపీవోకి మంచి స్పందన లభించిన సంగతి తెలిసిందే. ఇది మొత్తం 27.78 సార్లు సభ్యత్వం పొందింది. నాన్-ఇన్‌స్టిట్యూషనల్ బిడ్డర్‌ల కోసం రిజర్వ్ కోటా 46.33 రెట్లు, క్వాలిఫైడ్ ఇన్‌స్టిట్యూషనల్ బిడ్డర్‌ల కోసం రిజర్వ్ చేసిన కోటా 32.09 రెట్లు, రిటైల్ ఇన్వెస్టర్ల కోసం రిజర్వ్ చేయబడిన భాగం 17.44 రెట్లు సబ్‌స్క్రైబ్ చేయబడింది. కోల్‌కతాకు చెందిన జింక్ ఆక్సైడ్ కంపెనీ తన ఐపీవో ద్వారా రూ.251.19 కోట్లు సమీకరించింది. ఇందులో రూ.165 కోట్ల విలువైన తాజా షేర్ల ఇష్యూ జరగగా.. మిగిలిన 39,00,000 షేర్లను కంపెనీ ఆఫర్ ఫర్ సేల్ రూపంలో విక్రయించింది.

జేజీ కెమికల్స్ కంపెనీ 1975లో స్థాపించబడింది. దేశంలో 80 గ్రేడ్‌లకు పైగా జింక్ ఆక్సైడ్‌ను ఉత్పత్తి చేస్తుంది. దీని ఉత్పత్తులు సిరామిక్స్, పెయింట్స్, ఫార్మా, సౌందర్య సాధనాలు, ఎలక్ట్రానిక్స్ అండ్ బ్యాటరీలు, వ్యవసాయ రసాయనాలు, ఎరువులు, ప్రత్యేక రసాయనాలు, కందెనలు, ఆయిల్ అండ్ గ్యాస్, పశుగ్రాసంతో సహా వివిధ పారిశ్రామిక ఉత్పత్తుల తయారీలో వినియోగిస్తారు.