మహిళల వద్ద ఉన్న 25 వేల టన్నుల బంగారాన్ని ముందు బయటకు రప్పించండి.. ప్రదాని మోదీకి బులియన్ సంస్థలు డిమాండ్

ఆర్థిక సంక్షోభం కారణంగా విదేశీ మారక ద్రవ్యాన్ని ఆదా చేసేందుకు బంగారం కొనుగోళ్లు ఆపాలని ప్రధాని మోదీ పిలుపునివ్వడం, జ్యువెలరీ రంగంలో పెద్ద ఎత్తున చర్చకు దారితీసింది. అయితే, కేవలం కొనుగోళ్లను నిలిపివేయడం పరిష్కారం కాదని, దేశీయంగా ఇళ్లలో నిరుపయోగంగా ఉన్న బంగారాన్ని ఆర్థిక వ్యవస్థలోకి తీసుకురావడమే సరైన మార్గమని పరిశ్రమ వర్గాలు వాదిస్తున్నాయి. ముఖ్యంగా భారతీయ మహిళల వద్ద సుమారు 25 వేల టన్నుల బంగారం నిద్రాణంగా పడి ఉందని, దీనిని వెలికితీయడానికి ఒక సమగ్ర బంగారు నగదీకరణ పథకాన్ని' (Gold Monetisation Scheme) ప్రవేశపెట్టాలని తమిళనాడు జ్యువెలర్స్ ఫెడరేషన్ వంటి సంస్థలు డిమాండ్ చేస్తున్నాయి.

ప్రస్తుతం బంగారం ధరలు తులం (10 గ్రాములు) సుమారు రూ. 1,55,000 వద్ద సర్వకాలీన గరిష్ఠ స్థాయిలో ఉన్నాయి. ఈ విపరీతమైన ధరల పెరుగుదల వల్ల ఇప్పటికే మార్కెట్‌లో అమ్మకాలు 30 నుంచి 40 శాతం మేర పడిపోయాయి. ఇటువంటి సమయంలో ప్రధాని విజ్ఞప్తితో కొనుగోళ్లు మరింత తగ్గితే.. ఈ రంగంపై ఆధారపడిన లక్షలాది మంది కళాకారుల జీవితాలు రోడ్డున పడతాయని వ్యాపారులు ఆందోళన వ్యక్తం చేస్తున్నారు. దేశవ్యాప్తంగా సుమారు 4 నుంచి 7 కోట్ల మంది ప్రత్యక్షంగా లేదా పరోక్షంగా ఈ పరిశ్రమపై ఆధారపడి జీవిస్తున్నారు. ముఖ్యంగా సూరత్ వంటి తయారీ కేంద్రాలలో లక్షలాది మంది చేతివృత్తి కళాకారుల ఉపాధి దెబ్బతినే ప్రమాదం ఉంది.

పరిశ్రమ ప్రతినిధుల సూచన ప్రకారం.. ఇళ్లలో ఉన్న పాత బంగారాన్ని బ్యాంకుల ద్వారా సేకరించి, దానిని కరిగించి మళ్లీ మార్కెట్లోకి తీసుకురావడం ద్వారా దిగుమతులపై ఆధారపడటం తగ్గించవచ్చు. దీనివల్ల ఏటా మనం దిగుమతి చేసుకునే సుమారు 900 టన్నుల బంగారం బిల్లు తగ్గుతుంది, తద్వారా బిలియన్ల కొద్దీ డాలర్లు ఆదా అవుతాయి. ఇది అటు ప్రభుత్వానికి విదేశీ మారక ద్రవ్యాన్ని ఆదా చేయడమే కాకుండా, ఇటు ఆభరణాల రంగానికి అవసరమైన ముడిసరుకును దేశీయంగానే అందుబాటులోకి తెస్తుంది.

Also Read

బంగారం, వెండిపై కేంద్రం నుంచి మరో బిగ్ అప్‌డేట్.. దిగుమతి సుంకాలపై కీలక నిర్ణయం..

భారతదేశంలో బంగారం కేవలం ఒక లోహం మాత్రమే కాదు, అది సామాజిక భద్రత, సంస్కృతిలో భాగం. చిన్న వేడుక నుండి పెద్ద వివాహాల వరకు బంగారం లేకుండా ఏ ఆచారం పూర్తి కాదు. అందుకే, ప్రజలను బంగారం కొనవద్దని నిరుత్సాహపరచడం కంటే, వారి వద్ద ఉన్న బంగారాన్ని ఆర్థిక ఉత్పాదకత వైపు మళ్లించడమే మేలని నిపుణులు అభిప్రాయపడుతున్నారు.

ప్రభుత్వ ఆందోళనలను తాము గౌరవిస్తామని, కానీ జీవనోపాధిని దెబ్బతీసే నిర్ణయాల కంటే, దేశీయ నిల్వలను వినియోగించుకునే సుస్థిరమైన మార్గాలను ప్రభుత్వం అన్వేషించాలని జ్యువెలరీ రంగం కోరుతోంది. ఒకవేళ ప్రభుత్వం ఈ నగదీకరణ పథకాన్ని పకడ్బందీగా అమలు చేస్తే, అది దేశ ఆర్థిక వ్యవస్థకు కొత్త ఊపిరి పోయడమే కాకుండా, రూపాయి విలువను కూడా నిలబెడుతుందని చెబుతున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.