JD Vance: ముగిసిన చర్చలు! ఆ విషయంలో తగ్గేదేలే అంటున్న ఇరాన్.. యుద్ధం మళ్లీ మొదలైనట్టేనా?

అమెరికా, ఇరాన్ మధ్య గత దశాబ్ద కాలంలోనే అత్యంత కీలకమైన చర్చలు ఇస్లామాబాద్ వేదికగా జరిగాయి. అయితే, సుమారు 21 గంటల పాటు సాగిన ఈ సుదీర్ఘ చర్చలు ఎలాంటి ఫలితం లేకుండానే ముగిశాయి. ఈ చర్చల వైఫల్యంపై అమెరికా ఉపాధ్యక్షుడు జేడీ వెన్స్ (JD Vance) స్పందిస్తూ, ఇది అమెరికా కంటే ఇరాన్‌కే పెద్ద 'బ్యాడ్ న్యూస్' అని హెచ్చరించారు. అణు ఆయుధాలను అభివృద్ధి చేయబోమనే దీర్ఘకాలిక హామీని ఇవ్వడానికి ఇరాన్ నిరాకరించడమే ఈ చర్చలు విఫలం కావడానికి ప్రధాన కారణమని ఆయన పేర్కొన్నారు.

అణు సంక్షోభం: వీడని పీటముడి

ఇస్లామాబాద్‌ నుంచి బయలుదేరే ముందు జేడీ వెన్స్ మీడియాతో మాట్లాడుతూ.. "మా రెడ్ లైన్స్ ఏంటో మేము స్పష్టంగా చెప్పాం. కానీ ఇరాన్ మా షరతులను అంగీకరించలేదు" అని చెప్పారు. ఇరాన్ అణు సామర్థ్యాన్ని ఇప్పటికే దాడుల ద్వారా ధ్వంసం చేసినప్పటికీ, భవిష్యత్తులో మళ్లీ అణు ఆయుధాల వైపు వెళ్లబోమని రాజకీయంగా హామీ ఇవ్వాలని అమెరికా డిమాండ్ చేస్తోంది. కానీ, టెహ్రాన్ ప్రతినిధులు దీనిపై వెనక్కి తగ్గలేదు. ఫిబ్రవరి 28న ప్రారంభమైన ఈ యుద్ధం ఇప్పటికే 7వ వారంలోకి ప్రవేశించింది. ఇప్పటివరకు ఇరాన్‌లో 3,000 మందికి పైగా, లెబనాన్‌లో 2,000 మందికి పైగా ప్రాణాలు కోల్పోయారు.

ట్రంప్ 'ఫైనల్ ఆఫర్'.. నిర్ణయం ఇరాన్ చేతుల్లోనే!

చర్చల సందర్భంగా జేడీ వెన్స్ నిరంతరం డొనాల్డ్ ట్రంప్‌తో టచ్‌లో ఉన్నారు. "గత 21 గంటల్లో నేను ట్రంప్‌తో డజను సార్లు మాట్లాడాను" అని వెన్స్ వెల్లడించారు. అమెరికా తన చివరి , అత్యుత్తమ ప్రతిపాదనను (Final and Best Offer) టేబుల్‌పై ఉంచిందని, దీనిని అంగీకరిస్తారో లేదో ఇరానే తేల్చుకోవాలని ఆయన స్పష్టం చేశారు. అమెరికా ప్రతిపాదించిన 15 అంశాల ప్రణాళికలో అణు కార్యక్రమాల నియంత్రణతో పాటు 'స్ట్రెయిట్ ఆఫ్ హార్ముజ్' (Strait of Hormuz) మార్గాన్ని తిరిగి తెరవడం వంటి కీలక అంశాలు ఉన్నాయి.

ప్రపంచ ఇంధన మార్కెట్‌పై ప్రభావం

స్ట్రెయిట్ ఆఫ్ హార్ముజ్ మూతపడటంతో అంతర్జాతీయంగా చమురు ధరలు ఆకాశాన్ని తాకుతున్నాయి. ఈ మార్గం ద్వారానే ప్రపంచంలోని ఐదో వంతు చమురు రవాణా జరుగుతుంది. ఈ మార్గాన్ని క్లియర్ చేసే ప్రక్రియను ఇప్పటికే ప్రారంభించామని ట్రంప్ ప్రకటించారు. "డీల్ జరిగినా జరగకపోయినా, మేము సముద్ర మార్గాన్ని క్లియర్ చేస్తూనే ఉంటాం" అని ట్రంప్ స్పష్టం చేయడం గమనార్హం.

మరోవైపు ఇరాన్ విదేశాంగ మంత్రి అబ్బాస్ అరాగ్చీ మాట్లాడుతూ.. అమెరికాపై తమకు నమ్మకం లేదని, మళ్లీ దాడులు జరిగితే తాము గట్టిగా సమాధానం ఇస్తామని హెచ్చరించారు. తాత్కాలికంగా ప్రకటించిన రెండు వారాల కాల్పుల విరమణ (Ceasefire) గడువు ముగియనుండటంతో, ఇప్పుడు ప్రపంచమంతా ఏం జరుగుతుందో అని ఉత్కంఠగా ఎదురుచూస్తోంది.

ఏదేమైనా అమెరికా-ఇరాన్ మధ్య నెలకొన్న ఈ ఉద్రిక్తతలు కేవలం ఆ రెండు దేశాలకే పరిమితం కాకుండా మధ్యప్రాచ్యం మొత్తాన్ని ప్రమాదంలోకి నెట్టేలా ఉన్నాయి. జేడీ వెన్స్ (JD Vance) చేసిన వ్యాఖ్యలు యుద్ధం మళ్లీ తీవ్రతరం అయ్యే సూచనలను కనిపిస్తున్నాయి. ఒకవేళ ఇరాన్ అమెరికా ఆఫర్‌ను తిరస్కరిస్తే, ఈ ప్రాంతంలో మారణహోమం మరింత పెరిగే అవకాశం ఉంది. శాంతి చర్చలు మళ్లీ ఎప్పుడు మొదలవుతాయో లేక యుద్ధం కొనసాగుతుందో తెలియాలంటే మరికొన్ని రోజులు ఆగాల్సిందే.