'అలీబాబా' జాక్ మా కీలక నిర్ణయం, సాఫ్ట్‌బ్యాంక్ బోర్డు సభ్యత్వానికి రాజీనామా

అలీబాబా వ్యవస్థాపకులు జాక్ మా కీలక నిర్ణయం తీసుకున్నారు. సాఫ్ట్ బ్యాంక్ గ్రూప్ కార్పోరేషన్ డైరెక్టర్ బాధ్యతల నుండి తప్పుకుంటున్నారు. ఈ మేరకు జాక్ మా తన పదవికి రాజీనామా చేస్తున్నారని సాఫ్ట్ బ్యాంకు గ్రూప్ సోమవారం తెలిపింది. అదే విధంగా ముగ్గురు కొత్త సభ్యులను బోర్డులోకి ఆహ్వానించే ప్రతిపాదనలు సిద్ధం చేసినట్లు తెలిపింది.

జూన్ 25వ తేదీన జరిగే సమావేశంలో ఈ మేరకు నిర్ణయం తీసుకుంటామని తెలిపింది. ఈ కొత్త నియామకాలతో బోర్డు సభ్యుల సంఖ్య 13కు చేరుకుంటుందని తెలిపింది. వార్షిక సర్వ సభ్య సమావేశంలో గ్రూప్ సీఈవోతో సహా మూడు కొత్త నియామకాలను బోర్డుకు ప్రతిపాదిస్తామని సాఫ్ట్ బ్యాంక్ తెలిపింది. కాడెన్స్ డిజైన్స్ సిస్టమ్స్ సీఈవో లిప్ బూ టన్, వెసెడా బిజినెస్ స్కూల్ ప్రొఫెసర్ యూకో కవామోటో సభ్యులుగా చేరనున్నారు. కవామోటో బోర్డులో ఏకైక మహిళా సభ్యురాలు.

గత ఏడాది సెప్టెంబర్‌లో అలీబాబా ఎగ్జిక్యూటివ్ చైర్మన్‌గా పదవీ విరమణ చేశారు. సేవా కార్యక్రమాల కోసం శేష జీవితాన్ని వినియోగించుకునేందుకు రాజీనామా చేసినట్లు తెలిపారు. ఇప్పుడు సాఫ్ట్ బ్యాంక్ బోర్డు సబ్యుడిగా కూడా వైదొలగుతున్నారు. మరోవైపు, షేర్ల కొనుగోలుకు దాదాపు 4.7 బిలియన్ డాలర్లు విడుదల చేసేందుకు బోర్డు ఆమోదం తెలిపింది. ఈ మేరకు సాఫ్ట్ బ్యాంక్ వెల్లడించింది. అలీబాబాలో పెద్ద మొత్తంలో వాటాలు దక్కించుకునేందుకు సాఫ్ట్ బ్యాంకు ప్లాన్ చేస్తోంది.