Mutual Fund SIP: మ్యూచువల్ ఫండ్లలో సిప్ ఎప్పుడు నిలిపివేయాలంటే..!

మార్కెట్ అస్థిరత పెట్టుబడిదారులను వారి పెట్టుబడి నిర్ణయాలను పునరాలోచించుకునేలా చేస్తుంది. మార్కెట్లు కోలుకునే వరకు తమ సిస్టమాటిక్ ఇన్వెస్ట్‌మెంట్ ప్లాన్‌లను (SIP) నిలిపివేయాలా వద్దా అనే విషయం కూడా ఇందులో భాగంగా ఉంటుంది. మ్యూచువల్ ఫండ్ పరిశ్రమ నిపుణుల ప్రకారం సిప్ నిలిపివేయడం సమర్థనీయమైన పరిస్థితులు కొన్ని ఉన్నప్పటికీ.. కేవలం మార్కెట్ దిద్దుబాట్ల వల్ల సిప్ ఆపడం సరైంది కాదు. ఈక్విటీ మార్కెట్‌లోని హెచ్చుతగ్గుల ఆధారంగా కాకుండా, పెట్టుబడిదారుడి ఆర్థిక పరిస్థితులలోని మార్పుల ఆధారంగా ఈ నిర్ణయం తీసుకోవాలన్నారు.

సిప్ అనేది ఆర్థిక భారం కాకూడదు. ఒకవేళ పెట్టుబడిదారుడు నిజమైన నగదు కొరతను ఎదుర్కుంటుంటే పెట్టుబడి ఆపొచ్చు. తాత్కాలిక ఉద్యోగం లేదా ఆదాయ నష్టం, వైద్య అత్యవసర పరిస్థితి లేదా ఏదైనా ఊహించని నగదు ప్రవాహ అంతరాయం ఉంటే సిప్ నిలిపివేయవచ్చని గ్రోవ్ మ్యూచువల్ ఫండ్ సీఈఓ వరుణ్ గుప్తా అన్నారు. సిప్ ను ఒక వ్యూహాత్మక సాధనంగా కాకుండా, ఆదర్శవంతంగా ఒక దీర్ఘకాలిక నిబద్ధతగా చూడాలని ఆయన నొక్కి చెప్పారు. పెట్టుబడి పెట్టడం అనేది, అవసరమైన ఆర్థిక బాధ్యతలను నెరవేర్చడానికి లేదా అత్యవసర నిధిని నిర్వహించడానికి ఆటంకం కలిగించకూడదని నావి ఏఎంసీ సీఈఓ ఆదిత్య ముల్కి అన్నారు.

నిజమైన ఆర్థిక ఒత్తిడి సమయాల్లో ఆర్థిక స్థిరత్వాన్ని కాపాడుకోవడానికి ప్రాధాన్యత ఇవ్వాలని ఆనంద్ రాఠీ వెల్త్ ఎగ్జిక్యూటివ్ డైరెక్టర్ మనీష్ శ్రీవాస్తవ అన్నారు. పెట్టుబడిదారులు తమ దీర్ఘకాలిక లక్ష్యాల దిశగా పయనించడానికి, వారి ఆర్థిక పరిస్థితి స్థిరపడిన వెంటనే తమ సిప్ తిరిగి ప్రారంభించాలని సలహా ఇస్తున్నారు. తాత్కాలిక ఎదురుదెబ్బలు పెట్టుబడిదారులను వారి దీర్ఘకాలిక సంపద సృష్టికి అంతరాయం కలిగించకుండా ఉండేందుకు, ఒక ప్రత్యేక అత్యవసర నిధిని దగ్గర ఉంచుకోవాలని చెబుతున్నారు.

మార్కెట్ అస్థిరత, దిద్దుబాట్లు ఈక్విటీ పెట్టుబడిలో అంతర్భాగమని, ఇవి తరచుగా తక్కువ ధరలకు మరిన్ని యూనిట్లను కొనుగోలు చేయడానికి అవకాశాన్ని కల్పిస్తాయని వరుణ్ గుప్తా అంటున్నారు. దిద్దుబాట్ల సమయంలో సిప్‌లను నిలిపివేసి, మార్కెట్లు కోలుకున్న తర్వాత తిరిగి ప్రారంభించడం ద్వారా మార్కెట్‌ను అంచనా వేయడానికి ప్రయత్నించవద్దని కూడా ఆయన హెచ్చరిస్తున్నారు. సిప్ తాత్కాలికంగా నిలిపివేయడం వల్ల కలిగే అవకాశ వ్యయాన్ని పెట్టుబడిదారులు తరచుగా తక్కువగా అంచనా వేస్తారని ముల్కి అంటున్నారు. మార్కెట్ దిద్దుబాట్లు, పెట్టుబడిదారులకు అదే పెట్టుబడి మొత్తంతో ఎక్కువ యూనిట్లను కూడబెట్టుకోవడానికి వీలు కల్పిస్తాయని గుర్తు చేస్తున్నారు.