Ananth Ambani: ముదురుతున్న అనంత్ వివాదం.. అంబానీకే ఎదురెల్తోంది ఎవరు..??

Ananth Ambani: రిలయన్స్ ఇండస్ట్రీస్ అధినేతగా ముఖేష్ అంబానీ తీసుకునే నిర్ణయాలకు ఎదురుండదని తెలిసిందే. కానీ తన చిన్న కుమారుడి విషయంలో ఎదురుదెబ్బ తగులుతున్నట్లు తెలుస్తోంది.

అవును రిలయన్స్ ఇండస్ట్రీస్ బోర్డులో అనంత్ అంబానీ నియామకంపై వివాదం ముదురుతోంది. వాస్తవానికి రిలయన్స్ ఇండస్ట్రీస్ బోర్డులో అనంత్ అంబానీ నియామకానికి వ్యతిరేకంగా ఓటు వేయాలని అంతర్జాతీయ ప్రాక్సీ సలహా సంస్థ ఇనిస్టిట్యూషనల్ షేర్‌హోల్డర్ సర్వీసెస్ ఇంక్.. వాటాదారులకు సూచించింది. మార్కెట్ విలువ ప్రకారం భారతదేశపు అతిపెద్ద కంపెనీకి 28 ఏళ్ల అనంత్ అంబానీని వారసుడిగా ప్రవేశపెట్టే ప్రయత్నాలకు అడ్డంకులు ఎదురవుతున్నాయి.

అనంత్ అంబానీకి నాయకత్వం, బోర్డుకు సంబంధించిన వ్యవహారాల్లో అనుభవం తక్కువగా ఉండటంపై అనేక రకాల ప్రశ్నలు తలెత్తుతున్నాయి. అందువల్ల ప్రతిపాదనకు వ్యతిరేకంగా ఓటు అవసరం. దీని కారణంగా బోర్డులో అతని సహకారంపై ఆందోళనలు పెరిగాయి. అయితే రిలయన్స్ ఇండస్ట్రీస్ బోర్డులో అనంత్ అంబానీ అన్నయ్య ఆకాష్, సోదరి ఇషా అంబానీల నియామకానికి ఇన్స్టిట్యూషనల్ షేర్ హోల్డర్ సర్వీసెస్ మద్దతు ఇచ్చింది. అయితే ఈ మొత్తం ఎపిసోడ్‌పై రిలయన్స్ నుండి అధికారిక స్పందన లేదు.

మరో అంతర్జాతీయ ప్రాక్సీ సంస్థ గ్లాస్ లూయిస్ అనంత్ అంబానీ నియామకానికి అనుకూలంగా ఉంది. "అనుభవం ఆధారంగా మేము అనంత్ అంబానీని ఆకాష్, ఇషాల నుంచి వేరు చేయము," అని గ్లాస్ లూయిస్ డెక్కీ విండర్టో చెప్పారు. అయితే ఈ వివాధానికి ముఖేష్ ఎలా చెక్ పెడతారో చూడాల్సి ఉంది.