హార్ముజ్ జలసంధిపై ఇరాన్ కీలక ప్రకటన.. ఆ మూడు సముద్ర మార్గాలు అడ్డుకుంటామంటూ ట్రంప్‌కి స్ట్రాంగ్ వార్నింగ్..

పశ్చిమాసియాలో ఉద్రిక్తతలు పతాక స్థాయికి చేరిన వేళ.. అగ్రరాజ్యం అమెరికా, ఇరాన్ మధ్య మాటల యుద్ధం తీవ్రతరమైంది. హార్ముజ్ జలసంధిని కేంద్రంగా చేసుకుని సాగుతున్న ఈ పరిణామాలు ప్రపంచ వాణిజ్యాన్ని కలవరపెడుతున్నాయి. ఈ సంక్షోభానికి సంబంధించిన తాజా పరిణామాలను పరిశీలిస్తే.. అటు యుద్ధ మేఘాలు, ఇటు శాంతి చర్చల ప్రయత్నాలు ఏకకాలంలో కనిపిస్తున్నాయి.

హార్ముజ్ జలసంధి వద్ద అమెరికా విధిస్తున్న దిగ్బంధంపై ఇరాన్ తీవ్రంగా స్పందించింది. తమ నౌకలను, ట్యాంకర్లను అడ్డుకోవడం అంటే కాల్పుల విరమణను ఉల్లంఘించడమేనని ఇరాన్ సీనియర్ మిలిటరీ కమాండర్ అలీ అబ్దొల్లాహి హెచ్చరించారు. అమెరికా తన వైఖరిని మార్చుకోకపోతే కేవలం హార్ముజ్ మాత్రమే కాకుండా, పర్షియన్ గల్ఫ్, ఒమన్ గల్ఫ్, ఎర్ర సముద్ర మార్గాల్లో జరిగే అంతర్జాతీయ వాణిజ్య రవాణాను కూడా అడ్డుకుంటామని టెహ్రాన్ హెచ్చరించింది. ఇందుకోసం యెమన్‌లోని హౌతీ రెబల్స్ సహాయం తీసుకోవాలని Iran యోచిస్తోంది. ఇస్లామిక్ రిపబ్లిక్ సాయుధ దళాలు ఈ మార్గాల గుండా ఎటువంటి ఎగుమతి, దిగుమతులను సాగనివ్వవని ఆయన స్పష్టం చేశారు.

మరోవైపు అమెరికా అధ్యక్షుడు డొనాల్డ్ ట్రంప్ మాత్రం యుద్ధం త్వరలోనే ముగుస్తుందని ఆశాభావం వ్యక్తం చేస్తున్నారు. రెండు "అద్భుతమైన రోజులకు" ప్రపంచం సాక్ష్యం కాబోతోందని ఆయన ప్రకటించడం విశేషం. అయితే ట్రంప్ మాటలకు, చేతలకు పొంతన లేదని విశ్లేషకులు భావిస్తున్నారు. ఎందుకంటే, ఒకవైపు శాంతి గురించి మాట్లాడుతూనే, మరోవైపు పెంటగాన్ సుమారు 10 వేల అదనపు బలగాలను పశ్చిమాసియాకు తరలిస్తోంది. ఇదే సమయంలో, చైనా అధ్యక్షుడు షీ జిన్‌పింగ్‌తో జరిగిన రహస్య చర్చల అనంతరం, ఇరాన్‌కు ఆయుధాల సరఫరాను నిలిపివేయడానికి చైనా అంగీకరించిందని ట్రంప్ వెల్లడించారు. ఇది ఇరాన్‌ను ఒంటరిని చేసే వ్యూహంలో భాగమని తెలుస్తోంది.

మిత్రుడు అంటూనే భారత్ మీద కత్తి దూస్తున్న ట్రంప్..ఇరాన్, రష్యాల మీద పగతో ఇండియాకు తప్పని చిక్కులు..

ఈ క్లిష్ట పరిస్థితుల్లో మధ్యవర్తిత్వం వహించేందుకు పాకిస్థాన్ ముందడుగు వేసింది. పాక్ ఆర్మీ చీఫ్ ఫీల్డ్ మార్షల్ అసిమ్ మునీర్ నేతృత్వంలోని ఉన్నత స్థాయి బృందం బుధవారం టెహ్రాన్ చేరుకుంది. అమెరికా-ఇరాన్ మధ్య ఇస్లామాబాద్‌లో జరగబోయే రెండో విడత చర్చలకు ముందు ఈ పర్యటన అత్యంత ప్రాధాన్యతను సంతరించుకుంది. యుద్ధాన్ని నివారించి, దౌత్యపరమైన పరిష్కారం కనుగొనడమే ఈ పర్యటన ప్రధాన ఉద్దేశం.

అంతర్జాతీయంగా కీలకమైన హార్ముజ్ జలసంధిలో నౌకాయాన భద్రత కోసం ఐరోపా దేశాలు ఒక కొత్త ప్రణాళికను సిద్ధం చేస్తున్నాయి. జర్మనీ నేతృత్వంలో ఒక విస్తృత కూటమిని ఏర్పాటు చేసి, మైన్‌లను తొలగించే నౌకలను అక్కడ మోహరించాలని భావిస్తున్నారు. ఆశ్చర్యకరమైన విషయం ఏమిటంటే, ఈ రక్షణ మిషన్ నుండి ప్రస్తుతం యుద్ధంలో ప్రత్యక్షంగా పాల్గొంటున్న అమెరికా, ఇజ్రాయెల్, ఇరాన్‌లను మినహాయించాలని ఐరోపా దేశాలు యోచిస్తున్నాయి. తద్వారా నిష్పాక్షికమైన భద్రతను కల్పించి ప్రపంచ ఇంధన సరఫరాను పునరుద్ధరించవచ్చని వాల్ స్ట్రీట్ జర్నల్ పేర్కొంది. మొత్తానికి, పశ్చిమాసియా భవిష్యత్తు ఇప్పుడు జరగబోయే చర్చలు మరియు ఐరోపా దేశాల శాంతి ప్రణాళికలపైనే ఆధారపడి ఉంది.