Iran war: దానికి సిద్ధంగా ఉండండి అంటూ.. ఇరాన్ మాస్ వార్నింగ్!

గడిచిన రెండు వారాలుగా మధ్యప్రాచ్యంలో జరుగుతున్న యుద్ధం ఇప్పుడు ప్రపంచ ఇంధన మార్కెట్లను కుదిపేస్తోంది. అమెరికా, ఇజ్రాయెల్ జరిపిన ఉమ్మడి దాడులతో మొదలైన ఈ ఇరాన్ యుద్ధం (Iran War) ఇప్పుడు లెబనాన్ వంటి పొరుగు దేశాలకు వ్యాపించింది. ఇప్పటివరకు సుమారు 2,000 మందికి పైగా ప్రాణాలు కోల్పోయారు. బుధవారం ఇరాన్ బలగాలు గల్ఫ్ జలాల్లో వెళ్తున్న వాణిజ్య నౌకలపై దాడులు చేయడంతో పరిస్థితి మరింత విషమించింది.

ఇరాన్ యుద్ధం కారణంగా ఆయిల్ సంక్షోభం రోజురోజుకీ ముదురతోంది. తాజాగా ఆయిల్ గురించి ఇరాన్ ప్రపంచ దేశాలకు వార్నింగ్ విసిరింది. అత్యధిక రేట్లతో ఆయిల్ కొనుగోలు చేయడానికి సిద్ధంగా ఉండండి అంటూ హెచ్చరిస్తోంది.

$200కి చేరునున్న ఆయిల్ ధర?

ఇరాన్ సైనిక ప్రతినిధి ఇబ్రహీం జోల్ఫాకారి వాషింగ్టన్‌ను ఉద్దేశించి సంచలన వ్యాఖ్యలు చేశారు. "చమురు ధర బ్యారెల్ $200 కి చేరుకోవడానికి సిద్ధంగా ఉండండి. ప్రాంతీయ భద్రతను మీరు దెబ్బతీశారు కాబట్టి, దానికి తగిన మూల్యం చెల్లించాల్సిందే" అని ఆయన హెచ్చరించారు. బుధవారం చమురు ధరలు ఒక్కసారిగా 5 శాతం పెరిగి, మార్కెట్లో గందరగోళం సృష్టించాయి. ఇప్పటికే పెట్రోల్ పంపుల వద్ద ధరలు పెరుగుతుండటంతో ప్రపంచ దేశాలు ఆందోళన చెందుతున్నాయి.

హార్ముజ్ జలసంధిలో దిగ్బంధం

ప్రపంచ చమురులో ఐదో వంతు సరఫరా అయ్యే హార్ముజ్ జలసంధి (Strait of Hormuz) ఇప్పుడు ఇరాన్ అదుపులో ఉన్నట్లు తెలుస్తోంది. ఇరాన్ అక్కడ మైన్లను (Mines) మోహరించడంతో నౌకల ప్రయాణం ప్రమాదకరంగా మారింది. అమెరికా అధ్యక్షుడు డొనాల్డ్ ట్రంప్ మాత్రం "మేము ఇరాన్ నౌకాదళాన్ని, వాయుసేనను తుడిచిపెట్టేశాం, ఇప్పుడు అక్కడ మాదే పైచేయి" అని ప్రకటించారు. అయితే, క్షేత్రస్థాయిలో మాత్రం నౌకలపై దాడులు కొనసాగుతూనే ఉన్నాయి. బుధవారం జపాన్ , థాయ్‌లాండ్ నౌకలపై జరిగిన దాడులే ఇందుకు నిదర్శనం.

రంగంలోకి దిగుతున్న G7 , IEA

చమురు ధరలను నియంత్రించడానికి ఇంటర్నేషనల్ ఎనర్జీ ఏజెన్సీ (IEA) చరిత్రలోనే అతిపెద్ద నిర్ణయం తీసుకుంది. తమ వ్యూహాత్మక నిల్వల (Strategic Reserves) నుండి 400 మిలియన్ బారెల్స్ చమురును విడుదల చేయాలని సిఫార్సు చేసింది. దీనికి అమెరికా అధ్యక్షుడు ట్రంప్ ఆమోదం తెలిపారు. వచ్చే వారం నుండి అమెరికా తన నిల్వల నుండి 172 మిలియన్ బారెల్స్ విడుదల చేయనుంది. అటు G7 దేశాలు కూడా గల్ఫ్ జలాల్లో నౌకలకు రక్షణ (Escort) కల్పించే అంశాన్ని పరిశీలిస్తున్నాయి.

ఇరాన్ అంతర్గత పరిస్థితి

ఇరాన్ అగ్రనేత ఆయతుల్లా అలీ ఖమేనీ అంత్యక్రియలకు లక్షలాది మంది తరలివచ్చారు. ఆయన కుమారుడు మొజ్తాబా ఖమేనీ కూడా యుద్ధంలో స్వల్పంగా గాయపడినట్లు నివేదికలు చెబుతున్నాయి. అమెరికా ఆశించినట్లుగా ఇరాన్‌లో ప్రభుత్వంపై తిరుగుబాటు రాకపోగా, అక్కడి భద్రతా బలగాలు మరింత కఠినంగా వ్యవహరిస్తున్నాయి.

ఏదేమైనా ఈ యుద్ధం ఇలాగే కొనసాగితే, ప్రపంచవ్యాప్తంగా రవాణా ఖర్చులు పెరిగి, నిత్యావసర వస్తువుల ధరలు ఆకాశాన్నంటడం ఖాయంగా కనిపిస్తోంది.