ఇరాన్ యుద్ధంపై ట్రంప్ సంచలన ప్రకటన..నేనే లేకుంటే టెహ్రాన్ చేతిలో ప్రపంచం ముక్కలయ్యేదని వెల్లడి..

అమెరికా అధ్యక్షుడు డోనాల్డ్ ట్రంప్ తనదైన శైలిలో అంతర్జాతీయ రాజకీయాలను మరోసారి వేడెక్కించారు. ఫాక్స్ న్యూస్ ఛానల్‌లో మారియా బార్టిరోమో నిర్వహించే 'మార్నింగ్స్ విత్ మారియా' షోలో పాల్గొన్న ఆయన.. ఇరాన్‌తో నెలకొన్న యుద్ధ వాతావరణం దాదాపుగా ముగింపు దశకు చేరుకుందని సంచలన వ్యాఖ్యలు చేశారు. ఇరాన్ సంక్షోభంపై యాంకర్ పదేపదే ప్రశ్నించినప్పటికీ, ట్రంప్ చాలా ఆత్మవిశ్వాసంతో సమాధానమిస్తూ, బహుశా ఈ పోరాటం ముగిసిందనే తాను భావిస్తున్నట్లు పేర్కొన్నారు.

ఒకవేళ తాను ఈ యుద్ధాన్ని ముందే ప్రారంభించి ఉండకపోతే.. ఇరాన్ ఇప్పటికే అణ్వాయుధాలను సమకూర్చుకుని ఉండేదని, అప్పుడు ప్రపంచమంతా వారి ముందు తలవంచాల్సి వచ్చేదని ఆయన విశ్లేషించారు. ఇప్పుడు తాము తప్పుకున్నా కూడా ఇరాన్ మళ్లీ తన పునాదులను నిర్మించుకోవడానికి కనీసం రెండు దశాబ్దాల సమయం పడుతుందని, అయితే తమ పని ఇంకా పూర్తి కాలేదని ఆయన సంకేతాలిచ్చారు.

ప్రస్తుతం ఇరాన్ ప్రభుత్వం అమెరికాతో ఒక ఒప్పందాన్ని (డీల్) కుదుర్చుకోవడానికి తీవ్ర ఆసక్తిని ప్రదర్శిస్తోందని ట్రంప్ వెల్లడించారు. ఇరాన్‌లో రాడికల్ శక్తులను పూర్తిగా ఏరివేశామని, అధికార మార్పిడి కూడా జరిగిందని, కాబట్టి ఇకపై ఎలాంటి సమస్యలు ఉండబోవని ఆయన ధీమా వ్యక్తం చేశారు. ఏబీసీ న్యూస్ ప్రతినిధి జోనాథన్ కార్ల్‌తో మాట్లాడుతూ.. ప్రస్తుతం అమల్లో ఉన్న సీజ్‌ఫైర్‌ను (యుద్ధ విరామాన్ని) పొడిగించాల్సిన అవసరం లేదని, ఎందుకంటే త్వరలోనే ఒక శాశ్వత పరిష్కారం లేదా ఒప్పందం కుదురుతుందని ఆశిస్తున్నట్లు తెలిపారు. ఒకవేళ తాను గనుక దేశాధ్యక్షుడిగా లేకపోయి ఉంటే.. ఈ పాటికే ప్రపంచం ముక్కలయ్యేదని ట్రంప్ తనదైన శైలిలో వ్యాఖ్యానించారు.

మళ్లీ టారిఫ్ బాదుడు మొదలు పెట్టిన ట్రంప్.. ఇరాన్‌తో పాటు చైనా అంతు కూడా చూస్తామని సంచలన ప్రకటన..

మరోవైపు క్షేత్రస్థాయిలో అమెరికా సైన్యం తన పట్టును మరింత బిగిస్తోంది. ఇరాన్ తీర ప్రాంతంలోని పోర్టులను అమెరికా సెంట్రల్ కమాండ్ (CENTCOM) సంపూర్ణంగా దిగ్బంధించినట్లు ప్రకటించింది. హార్ముజ్ జలసంధిలో నౌకల రాకపోకలను పూర్తిగా అడ్డుకోవడం ద్వారా, ఆ ప్రాంతంలో తమ సైనిక, నౌకాదళ ఆధిపత్యాన్ని చాటుకున్నట్లు సెంట్ కామ్ అధినేత బ్రాడ్ కూపర్ వెల్లడించారు. కేవలం 36 గంటల వ్యవధిలోనే ఇరాన్ రేవుల నుండి వెళ్లే, లోపలికి వచ్చే వాణిజ్యాన్ని అమెరికా మిలిటరీ స్తంభింపజేసింది. ఈ ఆపరేషన్ కోసం అమెరికాకు చెందిన అత్యాధునిక నేవీ గైడెడ్ మిస్సైల్ డెస్ట్రాయర్లను రంగంలోకి దించారు. ఒక్కో డెస్ట్రాయర్ నౌకలో సుమారు 300 మంది సుశిక్షితులైన నావికులు ఉండి, ఏ క్షణమైనా శత్రువుపై విరుచుకుపడే సామర్థ్యాన్ని కలిగి ఉన్నారు.

అయితే, ఈ విషయంలో అమెరికాకు తన చిరకాల మిత్రదేశాల నుండి ఊహించని ప్రతిఘటన ఎదురవుతోంది. ఇరాన్ పోర్టులను బ్లాక్ చేయాలన్న ట్రంప్ పిలుపును బ్రిటన్, ఫ్రాన్స్ వంటి నాటో (NATO) దేశాలు తిరస్కరించాయి. ఈ ఘర్షణలో భాగస్వాములు కావడం తమకు ఇష్టం లేదని, బలవంతంగా తమను యుద్ధంలోకి ఈడ్చవద్దని ఆ దేశాలు స్పష్టం చేశాయి.

ప్రపంచ చమురు సరఫరాలో దాదాపు ఐదో వంతు హార్ముజ్ జలసంధి గుండానే జరుగుతుంది కాబట్టి, ఆ మార్గాన్ని తెరిపించడానికి మాత్రమే తాము సహకరిస్తామని, అంతకుమించి ఇరాన్‌పై సైనిక చర్యలకు తాము సిద్ధంగా లేమని అవి తేల్చిచెప్పాయి. ఈ వైఖరిపై Trump తీవ్ర ఆగ్రహం వ్యక్తం చేస్తూ, మిత్రదేశాలు సహకరించకపోతే తాము నాటో కూటమి నుండి వైదొలుగుతామని బెదిరించడం ఇప్పుడు అంతర్జాతీయ స్థాయిలో తీవ్ర చర్చకు దారితీసింది. రాబోయే రెండు రోజుల్లో ట్రంప్ తీసుకోబోయే నిర్ణయాలు ఇరాన్ భవిష్యత్తును, ప్రపంచ భద్రతను నిర్దేశించనున్నాయి.