Iran war: కేవలం గ్యాస్ ఒక్కటే కాదు.. ఈ 5 రంగాలపై భారీ ఎఫెక్ట్ ఉండే అవకాశం?

పశ్చిమాసియాలో జరుగుతున్న అమెరికా ఇరాన్ వార్ (Iran war) ఇప్పుడు 11వ రోజుకు చేరుకుంది. ఈ యుద్ధం కేవలం మూడు దేశాలకే పరిమితం కాకుండా గల్ఫ్ ప్రాంతమంతా విస్తరిస్తోంది. ప్రపంచ వాణిజ్యానికి అత్యంత కీలకమైన 'స్ట్రెయిట్ ఆఫ్ హోర్ముజ్' (Strait of Hormuz) మార్గంలో ఉద్రిక్తతలు పెరగడం వల్ల భారత ఆర్థిక వ్యవస్థపై తీవ్ర ప్రభావం చూపే అవకాశం కనిపిస్తోంది. అమెరికా అధ్యక్షుడు డొనాల్డ్ ట్రంప్ ఇరాన్‌ కు గట్టి హెచ్చరికలు జారీ చేయగా ఇరాన్ కూడా వెనక్కి తగ్గడం లేదు. ఒకవేళ ఈ యుద్ధం ఇలాగే కొనసాగితే.. రాబోయే రోజుల్లో భారత్‌ లో ముఖ్యంగా ఐదు రంగాలు దెబ్బ తినే అవకాశం ఉంది. అవేంటంటే..

1. ఇంధన రంగంపై పెను భారం

ముడి చమురు ధరలు ఇప్పటికే బ్యారెల్‌ కు 110 డాలర్లకు చేరుకున్నాయి. భారత్ తన చమురు అవసరాలలో 80% పైగా దిగుమతులపైనే ఆధారపడుతుంది. ఇరాన్ యుద్ధం (Iran war) కారణంగా సరఫరా గొలుసు దెబ్బతింటే.. మన దేశంలో పెట్రోల్, డీజిల్ ధరలు భారీగా పెరిగే అవకాశం ఉంది. ఇది కేవలం వాహనదారులకే కాకుండా విద్యుత్ ఉత్పత్తి వ్యయాన్ని కూడా పెంచుతుంది.

2. ద్రవ్యోల్బణం - సామాన్యుడిపై భారం

చమురు ధరలు పెరిగితే రవాణా ఖర్చులు పెరుగుతాయి. రవాణా ఖర్చులు పెరగడం వల్ల నిత్యావసర వస్తువులు, కూరగాయలు, పాలు వంటి ప్రతి వస్తువు ధర ఆకాశాన్ని తాకుతుంది. దీనినే 'ద్రవ్యోల్బణం' అంటారు. ద్రవ్యోల్బణం పెరిగితే దేశ జీడీపీ (GDP) వృద్ధి రేటు పడిపోవడమే కాకుండా స్టాక్ మార్కెట్లు కూడా కుప్పకూలే ప్రమాదం ఉంది. ఇది సామాన్యుడిపై ఎక్కువ ప్రభావాన్ని చూపుతుంది.

3. గల్ఫ్ దేశాల్లోని భారతీయుల భద్రత

కోట్లాది మంది భారతీయులు ఉపాధి కోసం గల్ఫ్ దేశాల్లో ఉంటున్నారు. యుద్ధం తీవ్రతరమైతే వారి భద్రత ప్రశ్నార్థకంగా మారుతుంది. ముఖ్యంగా కేరళ, బీహార్ వంటి రాష్ట్రాలకు గల్ఫ్ నుంచి వచ్చే విదేశీ నగదు (Remittances) ప్రధాన ఆదాయ వనరు. అక్కడ ఉపాధి దెబ్బతింటే ఈ రాష్ట్రాల ఆర్థిక పరిస్థితి తలకిందులవుతుంది.

4. వ్యవసాయ రంగంపై దెబ్బ

భారత వ్యవసాయానికి అవసరమైన ఎరువుల (Fertilisers) దిగుమతి గల్ఫ్ ప్రాంతం నుంచే జరుగుతుంది. యుద్ధం వల్ల ఎరువుల సరఫరా ఆగితే.. వ్యవసాయ ఉత్పత్తి తగ్గిపోతుంది. ఇది ఆహార ధాన్యాల కొరతకు, సాగు ఖర్చు పెరగడానికి దారితీస్తుంది. ఫలితంగా సామాన్యుడికి ఆహార భద్రత కరువయ్యే అవకాశం ఉంది.

5. పారిశ్రామిక ఉత్పత్తిలో అంతరాయం

ఆటోమొబైల్, ఎలక్ట్రానిక్స్, స్టీల్ , డైమండ్ పరిశ్రమలకు అవసరమైన ముడి సరుకులు హిందూ మహాసముద్రం మీదుగానే వస్తాయి. సరఫరా మార్గాలు మూతపడితే ఉత్పత్తి నిలిచిపోయి కంపెనీలు నష్టాల్లో కూరుకుపోతాయి. ఇది చివరికి ఉద్యోగాల కోతకు (Layoffs) దారితీసే ప్రమాదం ఉంది.
అప్రమత్తత అవసరం

ప్రస్తుత పరిస్థితుల్లో ఈ యుద్ధం భారత్‌ కు పెద్ద సవాల్‌ గా మారింది. ప్రభుత్వం ఇప్పటికే ప్రత్యామ్నాయ మార్గాలను వెతుకుతున్నప్పటికీ.. యుద్ధం సుదీర్ఘకాలం కొనసాగితే సామాన్యులపై భారం పడటం ఖాయం. అంతర్జాతీయ దౌత్య నీతి ద్వారా ఈ యుద్ధం త్వరగా ముగియాలని ప్రపంచ దేశాలు కోరుకుంటున్నాయి.