Click it and Unblock the Notifications
ఇరాన్‌పై మళ్లీ దాడులు స్టార్ట్ చేసిన అమెరికా.. మధ్యంతర ఎన్నికల్లో ఓటమిపై రగిలిపోతున్న ట్రంప్..
Iran-US War: మధ్యప్రాచ్యంలో ఉద్రిక్తతలు కొనసాగుతుండగానే.. అమెరికా సైన్యం శుక్రవారం ఇరాన్ వైమానిక రక్షణ వ్యవస్థలను లక్ష్యంగా చేసుకుని పరిమిత స్థాయిలో సరికొత్త వైమానిక దాడులను నిర్వహించింది. ఈ విషయాన్ని అధ్యక్షుడు డొనాల్డ్ ట్రంప్ స్వయంగా ధృవీకరిస్తూ.. ఇరాన్ సిద్ధం చేసుకున్న ఒక చిన్న విమాన విధ్వంసక పరికరాన్ని తమ బలగాలు కేవలం 5 నుండి 15 నిమిషాల వ్యవధిలోనే విజయవంతంగా నిర్వీర్యం చేశాయని తెలిపారు.
చమురు రవాణాకు ఎంతో కీలకమైన హార్ముజ్ జలసంధి సమీపంలోని ఖేష్మ్ ద్వీపంలో (సుజా ప్రాంతం) భారీ పేలుళ్ల శబ్దాలు వినిపించినట్లు ఇరాన్ అధికారిక మీడియా వెల్లడించింది. అమెరికా 2026 మధ్యంతర ఎన్నికలలో రిపబ్లికన్ పార్టీ ఓటమి తదనంతరం చోటుచేసుకున్న తొలి సైనిక దాడి ఇది.ఒకవైపు సైనిక దాడులు జరుగుతున్నప్పటికీ.. ఎనిమిది నెలలుగా సాగుతున్న ఈ ఘర్షణలను ముగించేందుకు దౌత్య ప్రయత్నాలు తీవ్రమయ్యాయి. పశ్చిమాసియా ప్రాంతీయ దేశమైన ఖతార్ రాయబారంతో ఇరాన్-అమెరికాల మధ్య ఒక తాత్కాలిక 'మధ్యంతర ప్రతిపాదన' (Bridge Deal) పై సంప్రదింపులు సాగుతున్నాయి.
అయితే తమ ఓడరేవులపై అమెరికా విధించిన దిగ్బంధనాన్ని ఎత్తివేయడం, ఆంక్షల రద్దు, స్తంభింపజేసిన నిధుల విడుదల, యుద్ధ నష్టపరిహారంతో పాటు ప్రాంతీయ శత్రుత్వాలను అంతం చేయడం వంటి ముందస్తు షరతులకు వాషింగ్టన్ ఆమోదం తెలిపే వరకు నేరుగా అణు చర్చలకు సిద్ధంగా లేమని టెహ్రాన్ స్పష్టం చేసింది.
ఇదే క్రమంలో ఇరాన్ అణు నిల్వలు, శాస్త్రవేత్తలు, సంబంధిత మౌలిక సదుపాయాల కదలికలపై నిఘా వర్గాలకు పక్కా సమాచారం అందించిన వారికి యూఎస్ సెంట్రల్ కమాండ్ (CENTCOM) 20 మిలియన్ డాలర్ల (సుమారు ₹188 కోట్లు) బహుమతిని ప్రకటించడం అంతర్జాతీయంగా సంచలనం సృష్టించింది.
ఖతార్ బ్రిడ్జ్ డీల్ ప్రతిపాదించిన రెండు రోజుల విశ్వాస నిర్మాణ చర్యలు:
మొదటి రోజు (దిగ్బంధన తొలగింపు & IAEA తనిఖీలు): ఇరాన్ ఓడరేవులపై అమెరికా దిగ్బంధనాన్ని ఎత్తివేస్తూ ఇరాన్ చమురు విక్రయాలకు అనుమతి ఇవ్వడం, ఏళ్ల తరబడి స్తంభింపజేసిన బిలియన్ల డాలర్ల నిధులలో కొంత భాగాన్ని విడుదల చేయడం. దీనికి ప్రతిగా దాడులకు గురైన ఇరాన్ అణు, సైనిక స్థావరాలలో అంతర్జాతీయ అణుశక్తి సంస్థ (IAEA) ఇన్‌స్పెక్టర్ల పర్యవేక్షణకు టెహ్రాన్ సమ్మతించాలి.
రెండో రోజు (హోర్ముజ్ జలసంధి పునఃప్రారంభం): ఇరాన్, ఒమన్‌ల మధ్య కుదిరిన సవరించిన నిబంధనల ఆధారంగా హోర్ముజ్ జలసంధిని వాణిజ్య నౌకల కోసం ఇరాన్ తెరిచి ఉంచాలి. దీని తరువాత, ఇరాన్ వద్ద ఉన్న 60 శాతం స్వచ్ఛతతో కూడిన 440.9 కిలోగ్రాముల సుసంపన్న యురేనియంపై పూర్తిస్థాయి చర్చలు నిర్వహించాలి.
వైట్ హౌస్ ఈ డిమాండ్లపై నేరుగా వ్యాఖ్యానించనప్పటికీ.. టెహ్రాన్‌తో తమ ప్రతినిధుల ద్వారా నిరంతరం దౌత్య సంప్రదింపులు జరుగుతున్నాయని ట్రంప్ తెలిపారు. ఈ యుద్ధం మరింత తీవ్రరూపం దాల్చకుండా నిరోధించేందుకు ఖతార్ ఎమిర్, ఈజిప్టు, ఇరాక్, ట్యునీషియా విదేశాంగ మంత్రులు ఉన్నత స్థాయి రాయబార చర్చలు జరుపుతున్నారు.
Sign in with Google