అమెరికాకు భారీ షాకిచ్చిన ఇరాన్.. 4 వేల మైళ్ల దూరం నుంచి డియాగో గార్సియా సైనిక స్థావరంపై దాడి..

మధ్యప్రాచ్యంలో యుద్ధ మేఘాలు మరింతగా ముసురుకున్నాయి. ఇరాన్ తన సైనిక సామర్థ్యాన్ని ప్రదర్శిస్తూ అమెరికాకు చెందిన అత్యంత వ్యూహాత్మక స్థావరాలను లక్ష్యంగా చేసుకోవడం అంతర్జాతీయంగా ఆందోళన రేకెత్తిస్తోంది. ముఖ్యంగా హిందూ మహాసముద్రంలోని డియాగో గార్సియా (Diego Garcia) సైనిక స్థావరంపై ఇరాన్ రెండు మధ్యశ్రేణి బాలిస్టిక్ క్షిపణులను ప్రయోగించడం ఈ ఉద్రిక్తతలను మరో స్థాయికి తీసుకెళ్లింది. అమెరికా, బ్రిటన్‌లు సంయుక్తంగా నిర్వహిస్తున్న ఈ స్థావరంపై దాడి ప్రయత్నం ఇరాన్ యొక్క విస్తరిస్తున్న క్షిపణి పరిధిని ప్రపంచానికి చాటిచెప్పింది.

అమెరికా రక్షణ వర్గాల సమాచారం ప్రకారం.. ప్రయోగించిన రెండు క్షిపణులలో ఒకటి సాంకేతిక కారణాలతో మార్గమధ్యంలోనే విఫలమవ్వగా, రెండో దానిని అమెరికా నౌకాదళం తన అధునాతన SM-3 ఇంటర్‌సెప్టర్ ద్వారా అడ్డుకుంది. ఈ SM-3 క్షిపణికి ఒక ప్రత్యేకత ఉంది.. ఇందులో ఎలాంటి పేలుడు పదార్థాలు ఉండవు. ఇది లక్ష్యాన్ని నేరుగా అత్యంత వేగంతో ఢీకొట్టి నాశనం చేసే 'హిట్-టు-కిల్' సాంకేతికతతో పనిచేస్తుంది. గంటకు 600 మైళ్ల వేగంతో ప్రయాణించే పది టన్నుల ట్రక్కు కలిగించేంతటి విధ్వంసక శక్తిని ఇది ఉత్పత్తి చేస్తుంది.

ఈ దాడి ప్రయత్నం రక్షణ నిపుణులను ఆశ్చర్యానికి గురిచేసింది. ఎందుకంటే ఇరాన్ ఇప్పటివరకు తన క్షిపణి పరిధి కేవలం 2 వేల కిలోమీటర్లు మాత్రమేనని చెబుతూ వచ్చింది. కానీ, ఇరాన్ నుండి సుమారు 4 వేల కిలోమీటర్ల దూరంలో ఉన్న డియాగో గార్సియాను లక్ష్యంగా చేసుకోవడం చూస్తుంటే.. ఆ దేశం తన నిజమైన సైనిక సామర్థ్యాలను ప్రపంచానికి తెలియకుండా దాచి ఉంచిందని అర్థమవుతోంది. ఇది పశ్చిమ దేశాల భద్రతా వ్యూహాలను పునఃసమీక్షించుకునేలా చేస్తోంది.

ట్రంప్ మరో భారీ స్కెచ్.. ఇరాన్ హార్ట్‌ అయిన ఖర్గ్ ద్వీపంపై కన్ను.. ఏ క్షణమైనా మిసైళ్లతో దాడి..

మరోవైపు అమెరికా అధ్యక్షుడు డొనాల్డ్ ట్రంప్ ప్రస్తుతానికి కాల్పుల విరమణకు మొగ్గు చూపడం లేదు. చర్చలకు అవకాశం ఉన్నప్పటికీ.. యుద్ధం మధ్యలో వెనక్కి తగ్గడం సరైనది కాదని ఆయన స్పష్టం చేశారు. Iran అణ్వాయుధ సామర్థ్యాన్ని అడ్డుకోవడం, ఆ దేశ క్షిపణి, రక్షణ మౌలిక సదుపాయాలను పూర్తిగా నిర్వీర్యం చేయడమే తమ లక్ష్యమని ట్రంప్ ప్రకటించారు. ఇందుకోసం అమెరికా రక్షణ సంస్థలు తమ క్షిపణి ఉత్పత్తిని రెండు నుండి నాలుగు రెట్లు పెంచుతున్నాయి.

ఇరాన్ కూడా తన వైఖరిని కఠినతరం చేస్తూనే ఉంది. ఒకవేళ యుద్ధం తీవ్రమైతే.. దాని ప్రభావం కేవలం మధ్యప్రాచ్యానికే పరిమితం కాదని, ప్రపంచవ్యాప్తంగా ఉన్న శత్రువుల పర్యాటక ప్రదేశాలు, బహిరంగ స్థలాలు కూడా సురక్షితం కాదని ఇరాన్ జనరల్ అబోల్ఫజల్ షెకర్చి హెచ్చరించారు. ఇప్పటికే కువైట్‌లోని అతిపెద్ద రిఫైనరీపై డ్రోన్ దాడులు జరగడం.. యూఏఈకి హెచ్చరికలు జారీ చేయడం చూస్తుంటే ఇరాన్ ఎంతటి సాహసానికైనా సిద్ధపడుతోందని తెలుస్తోంది. బ్రిటన్ తన స్థావరాలను అమెరికాకు ఇవ్వడాన్ని కూడా ఇరాన్ తప్పుబడుతోంది.

ఇక ఇరాన్ కొంత వ్యూహాత్మక వెసులుబాటును కూడా ప్రదర్శిస్తోంది. హార్ముజ్ జలసంధి గుండా జపాన్ నౌకలను అనుమతిస్తామని చెప్పడం ద్వారా, తనకు కావాల్సిన దేశాలతో సంబంధాలను కాపాడుకుంటూనే.. అమెరికా కూటమిపై ఒత్తిడి పెంచుతోంది. అయితే, ఇజ్రాయెల్ ప్రధాని నెతన్యాహు మాత్రం ఇరాన్ సైనిక శక్తిని తాము ఇప్పటికే భారీగా దెబ్బతీశామని, వారి ఆయుధ కర్మాగారాలే తమ తదుపరి లక్ష్యమని ప్రకటించారు. ఈ పరిణామాలు పశ్చిమాసియాను ఒక అనిశ్చిత స్థితిలోకి నెట్టివేస్తున్నాయి.