చెన్నై నుంచి జడేజా, హైదరాబాద్ నుంచి షమీ ఔట్.. IPL 2026 రిటెన్షన్ గడువుకు ముందే కీలక పరిణామం..

2026 ఇండియన్ ప్రీమియర్ లీగ్ (IPL) సీజన్ నిలుపుదల గడువు సమీపిస్తున్న సమయంలో.. ఫ్రాంచైజీలు ఎనిమిది ప్రధాన ఆటగాళ్ల ట్రేడ్లను అధికారికంగా ప్రకటించాయి. ఇందులో రవీంద్ర జడేజా, సంజు సామ్సన్, మహమ్మద్ షమీ వంటి స్టార్ ఆటగాళ్ల మార్పులు లీగ్‌లో ముందే సంచలనంగా మారాయి. 12 సీజన్లుగా చెన్నై సూపర్ కింగ్స్ (CSK)లో కీలక ఆటగాడిగా కొనసాగిన రవీంద్ర జడేజా, రాజస్థాన్ రాయల్స్‌ (RR)కు షిఫ్ట్ అయ్యాడు. రవీంద్ర జడేజా 250 మ్యాచుల్లో CSKకు ప్రాతినిధ్యం వహించి కీలక ఆటగాడిగా నిలిచాడు. కొత్త ఒప్పందం ప్రకారం అతని లీగ్ ఫీజు రూ. 18 కోట్ల నుంచి రూ. 14 కోట్లకు తగ్గింది.

అదే సమయంలో రాజస్థాన్ రాయల్స్‌కు దశాబ్దానికి పైగా సేవలందించిన వికెట్ కీపర్-బ్యాటర్ సంజు సామ్సన్ ఇప్పుడు CSKలో చేరాడు. రూ.18 కోట్ల ఫీజుతో ఆయన చెన్నై తరపున ఆడనున్నాడు. 177 IPL మ్యాచ్‌ల అనుభవంతో సామ్సన్ లీగ్‌లో అత్యంత స్థిరమైన బ్యాటర్‌లలో ఒకరిగా ఉన్నారు. RR-DC-RR ప్రయాణం తర్వాత ఇది అతని కెరీర్‌లో ఇది మూడో ఫ్రాంచైజీ మార్పు.

CSK నుండి RRకు వచ్చిన మరో ప్రముఖ ఆటగాడు ఇంగ్లాండ్ ఆల్‌రౌండర్ సామ్ కరన్. రూ. 2.4 కోట్ల ప్రస్తుత రిటైనర్‌తో ఆయన మూడో ఫ్రాంచైజీగా RRను ఎంచుకున్నాడు. ఇప్పటి వరకు 64 IPL మ్యాచ్‌ల్లో రాణించిన కరన్.. ప్రతి టీంలో కీలక ఆటగాడిగా మారాడు.

ఇక ఈ జాబితాలో అత్యంత అనుభవజ్ఞులైన ఫాస్ట్‌బౌలర్ మహమ్మద్ షమీ కూడా ఉన్నాడు. SRH నుండి LSGకి రూ. 10 కోట్ల ఫీజుతో బదిలీ అయ్యాడు షమీ. 119 IPL మ్యాచ్‌ల అనుభవంతో LSG పేస్ అటాక్‌కు షమీ అనుభవం మంచి బలాన్నిస్తుంది. గాయంతో 2024 సీజన్‌కు దూరమైనప్పటికీ, 2023లో పర్పుల్ క్యాప్ గెలుచుకున్న షమీ తన ప్రభావాన్ని తిరిగి చూపే అవకాశం ఉంది.

మరో ఆటగాడు లెగ్-స్పిన్నర్ మయాంక్ మార్కండే తిరిగి తన తొలి ఫ్రాంచైజీ అయిన ముంబై ఇండియన్స్‌ (MI)లో చేరాడు. 2018లో IPL అరంగేట్రం చేసిన మార్కండే KKR నుంచే రూ. 30 లక్షలకు MIకి వచ్చాడు. ఇప్పటి వరకు 37 మ్యాచ్‌ల్లో 37 వికెట్లు తీసిన మార్కండే తన రెండో ఇన్నింగ్స్‌ను MIతో ప్రారంభించనున్నాడు. ఇక యువ బౌలింగ్ ఆల్‌రౌండర్ అర్జున్ టెండూల్కర్ కూడా ముంబై నుంచి లక్నో సూపర్ జెయింట్స్‌ (LSG)కు బదిలీ అయ్యాడు. 2023లో MI తరపున అరంగేట్రం చేసిన అర్జున్, రూ. 30 లక్షల ప్రస్తుత రుసుముతో LSGలో ఆడనున్నాడు. డెత్ ఓవర్ బౌలింగ్, హిట్టింగ్ సామర్థ్యం అతనిని విలువైన ఆల్‌రౌండర్‌గా నిలబెట్టాయి.

ఐపీఎల్ 2026 సీజన్ ఇప్పటికే ఆసక్తికర మలుపు తిరిగింది. ఈ ట్రేడ్లు జట్ల సమీకరణాన్ని పూర్తిగా మార్చాయి. రాబోయే వేలం, నిలుపుదల ప్రక్రియలు ఎలా సాగుతాయన్నదే ఇప్పుడు లీగ్‌లో ప్రధాన చర్చనీయాంశంగా మారింది.