Viral News: కట్టలు తెంచుకున్న ఇన్వెస్టర్ల ఆగ్రహం.. 'బాయ్‌కాట్ జెరోధా' హ్యాష్‌ట్యాగ్ ట్రెండింగ్

Zerodha News: స్టాక్‌ మార్కెట్లో సాంప్రదాయ బ్రోకరేజ్ సంస్థలకు భిన్నంగా పలు డిస్కౌంట్ బ్రోకర్లు పుట్టుకొచ్చాయి. వాటిలో జెరోధా పెట్టుబడిదారుల అభిమానం చూరగొంది. దాని ఇంటర్‌ఫేస్ సహా పలు ఫీచర్స్ సంస్థను అగ్రగామిగా నిలిపాయి. అయితే ఇటీవల జెరోధాపై వ్యతిరేకత పెరుగుతూ వస్తోంది.

జెరోధా ట్రేడింగ్ యాప్ కైట్ గత కొన్ని నెలల నుంచి వరుసగా టెక్నికల్ గ్లిచ్‌లను ఎదుర్కొంటోంది. శుక్రవారం ట్రేడింగ్ చేస్తున్న సమయంలో తలెత్తిన సాంకేతిక ఇబ్బందుల వల్ల క్లయింట్‌లకు నష్టం వాటిల్లింది. ఇదే గతంలోనూ పలుమార్లు పునరావృతం కావడంతో చాలా మంది వినియోగదారులు సోషల్ మీడియా వేదికగా తిట్టిపోశారు. ఇందులో భాగంగా "బాయ్‌ కాట్ జెరోధా" హ్యాష్ ట్యాగ్‌ను ట్రెండ్‌ చేశారు.

'జెరోధాలో టెక్నికల్ లోపం కారణంగా జూలై 2023లో 33వేలు నష్టపోయాను. మధ్యాహ్నం 3 గంటల సమయంలో పెట్టిన బై ఆర్డర్‌ 3.31కి ఎగ్జిక్యూట్ అయింది. ఫిర్యాదు చేసిన అనంతరం నాకు 50 శాతం తిరిగి ఇస్తానని కంపెనీ ప్రతినిధులు చెప్పారు. కానీ ఇప్పటి వరకు వారి నుంచి ఎటువంటి స్పందన లేదు' అంటూ ఓ వినియోగదారుడు తన అనుభవాన్ని Xలో పోస్ట్ చేశారు.

గత నాలుగు నెలల్లో వరుసగా నాలుగు సార్లు జెరోధాలో సాంకేతిక లోపాలు తలెత్తాయి. అక్టోబర్ 31, నవంబర్ 6, డిసెంబరు 4 మరియు జనవరి 29 తేదీల్లో పలువురు యూజర్లు సమస్యను ఎదుర్కొన్నారు. నియంత్రణ సంస్థలు ఇప్పటికైనా ఈ విషయాన్ని పరిశీలించాలని వినియోగదారులు కోరుతున్నారు.