Zerodha: జెరోధా బ్రోకింగ్ యూజర్లకు షాక్.. యాప్ వినియోగంలో గ్లిచ్.. లాభాలు హుష్ కాకి..

Trading Trouble: దేశంలో డిస్కౌంట్ బ్రోకింగ్ ప్రవేశపెట్టి పెద్ద సక్సెస్ రుచిచూసిన సంస్థగా జెరోధా నిలిచింది. దీనిని కామత్ బ్రదర్స్ ప్రారంభించగా.. ఇప్పటికే లక్షల సంఖ్యలో యాక్టివ్ ఇన్వెస్టర్లను కంపెనీ కలిగి ఉంది.

డీమ్యాట్ ఖాతాల సంఖ్యలో రెండవ స్థానానికి ఇటీవల దిగజారినప్పటికీ ట్రేడింగ్ కొనసాగిస్తున్న అధిక ఇన్వెస్టర్లు కలిగిన కంపెనీగా మాత్రం అందరి కంటే ముందు స్థానంలో కొనసాగుతోంది. అయితే తరచుగా జెరోధా కైట్ యాప్ వినియోగదారులు టెక్నికల్ గ్లిచ్ లేదా యాప్ క్రాష్ వంటి ఇబ్బందులను ఎప్పటి నుంచో ఎదుర్కొంటున్నారు. ఈ రోజు ఉదయం సైతం వారికి ఇదే పరిస్థితి ఎదురుకావటంతో చాలా మంది ఆందోళన వ్యక్తం చేస్తున్నారు.

సోమవారం నాడు జెరోధా వినియోగదారులు తమ ఖాతాల్లో తమ హోల్డింగ్‌లు, ట్రేడ్‌లు వంటి వివరాలను చూడలేకపోతున్నామంటూ సోషల్ మీడియా వేదికల్లో పోస్టులు చేశారు. తమ పొజిషన్లు క్లోజ్ చేసుకునేందుకు యాప్ సహకరించకపోవటం వల్ల లాభాలకు బదులు నష్టాలు చవిచూసినట్లు.. ఇలా చేసినందుకు జెరోధాకు ధన్యవాదాలంటూ ఒక వినియోగదారుడు పోస్ట్ చేశాడు. దీనిపై ఫిర్యాదు చేసేందుకు కస్టమర్ కేర్ సభ్యులను సంప్రదించటానికి చేసిన ప్రయత్నాలకు ఎవరూ రెస్పాండ్ కలేదంటూ మరో వినియోగదారుడు వెల్లడించాడు.

మార్కెట్లలో బుల్ జోరు కొనసాగుతున్న వేళ ఇలా జరగటంపై జెరోధా వినియోగదారులు సీరియస్‌గా ఉన్నారు. దీనిపై ఎట్టకేలకు స్పందించిన బ్రోకరేజ్ సంస్థ కనెక్టివిటీ సమస్య కారణంగా అంతరాయం ఏర్పడిందని బదులిచ్చింది. సమస్య పరిష్కరించబడిందని ఇలా జరిగినందుకు తాము చింతిస్తున్నామంటూ ఒక ప్రకటన విడుదల చేసింది.