2 రోజుల్లో రూ.6.98 లక్షల కోట్లు మటాష్, రూపాయి మరింత బలహీనం

మార్కెట్లు ఈ వారంలో మొదటి రెండు రోజులు నష్టాలను మూటగట్టుకున్నాయి. సోమవారం అయితే సెన్సెక్స్ ఏకంగా 2వేల పాయింట్లకు పైగా నష్టపోయింది. గత రెండు సెషన్లలో బీఎస్ఈ ఇన్వెస్టర్ల సంపద రూ.6.98 లక్షల కోట్లు హరించుకుపోయింది. దీంతో బీఎస్ఈ లిస్టైన కంపెనీల మార్కెట్ క్యాపిటలైజేషన్ వ్యాల్యూ రూ.122.343 లక్షల కోట్లకు తగ్గింది.

70 స్టాక్స్ 50% కంటే ఎక్కువ నష్టపోయాయి

కరోనా కారణంగా జనవరి నుండి BSE500లోని 70 స్టాక్స్ దాదాపు 50 శాతం మేర పడిపోయాయి. కొన్ని స్టాక్స్ 80 శాతం వరకు కూడా పడిపోయాయి. ఇందులో కెరా బ్యాంకు, డిష్ టీవీ, డెల్టా కార్పోరేషన్, ఫ్యూచర్ రిటైల్, గాయత్రి ప్రాజెక్టు, ఆర్బీఎల్ బ్యాంకు, రెప్కో హోమ్ ఫైనాన్స్, ప్రెస్టీజ్ ఎస్టేట్ తదితరాలు ఉన్నాయి.

డైలమాలో మార్కెట్లు

కరోనా మహమ్మారి, దేశవ్యాప్తంగా లాక్ డౌన్, అంతర్జాతీయ పరిణామాలతో మార్కెట్లు గత రెండు రోజులుగా భారీ నష్టాలను చూశాయి. మొన్న భారీ నష్టాలను చూసిన మార్కెట్లు, నిన్న స్వల్పంగా నష్టపోయాయి. ఈ రోజు నష్టాలతో ప్రారంభమై లాభాల్లోకి వచ్చాయి. మధ్యాహ్నం గం.11 సమయానికి సెన్సెక్స్ 400 పాయింట్లకు పైగా లాభాల్లో ఉంది. మార్కెట్ డైలమాలోనే ఉందని ఇన్వెస్టర్లు భావిస్తున్నారు.

రూపాయి బలహీనం

అమెరికా డాలర్ మారకంతో రూపాయి ఈ రోజు (బుధవారం ఏప్రిల్ 6) బలహీనపడింది. 18 పైసలు బలహీనపడి 75.81 వద్ద ట్రేడింగ్ ప్రారంభించింది. ఓవర్సీస్‌లో అమెరికా కరెన్సీ బలపడటం, విదేశీ నిధుల ప్రవాహం ఔట్ ఫ్లో వంటి పలు కారణాలు రూపాయిపై ప్రభావం చూపాయి. మంగళవారం రూపాయి కాస్త బలపడి 75.63 వద్ద ముగిసింది. ఈ రోజు మళ్లీ బలహీనపడింది.