Crude Oil: తగ్గిన క్రూడ్ ఆయిల్ ధరలు.. పెట్రోల్, డీజిల్ రేట్లు తగ్గుతాయా..!

అంతర్జాతీయ మార్కెట్ లో క్రూడ్ ఆయిల్ ధరలు తగ్గుతోన్నాయి. ఇది క్రూడ్ ఆయిల్ భారీగా దిగుమతి చేసుకునే ఇండియా, చైనా దేశాలకు శుభవార్తగా చెప్పుకోవచ్చు. ముడి చమురు ధరలు బ్యారెల్ కు 80 డాలర్ల దిగువకు పడిపోయాయి. డబ్ల్యూటీఐ ముడి చమురు బ్యారెల్‌కు 78.99 డాలర్ల వద్ద ట్రేడవుతోంది. ఇజ్రాయెల్, ఇరాన్ మధ్య ఉద్రిక్తత కొనసాగుతున్నప్పటికీ గత నెలలో ముడి చమురు ధరలలో సుమారు 13 శాతం క్షీణత నమోదయింది.

అటు బ్రెంట్ ముడి చమురు బ్యారెల్‌కు 83.57 డాలర్లుగా ట్రేడవుతోంది. గత సంవత్సరం ఇదే సమయంలో ముడి చమురు బ్యారెల్‌కు $ 91 స్థాయికి చేరుకుంది. ముడిచమురు ధరల పతనం భారత్‌కు ఉపశమనం కలిగించింది. దీంతో ప్రభుత్వ చమురు కంపెనీలకు అత్యంత ఉపశమనం లభించినట్లయింది. ముడి చమురు ధరల పెరుగుదల కారణంగా 2023-24 ఆర్థిక సంవత్సరం నాలుగో త్రైమాసికంలో ప్రభుత్వ చమురు కంపెనీల లాభాల్లో క్షీణత కనిపించింది.

ముడిచమురు ధరల పతనం ప్రభావం స్టాక్ మార్కెట్‌లోనూ కనిపించింది. ప్రభుత్వ చమురు కంపెనీల షేర్లలో బలమైన పెరుగుదల కనిపించింది. బీపీసీఎల్ షేరు 4.45 శాతం జంప్‌తో రూ.634.80 వద్ద ముగిసింది. హెచ్‌పీసీఎల్ షేర్లు 7.67 శాతం జంప్‌తో రూ.533.20 వద్ద ముగిశాయి. ఐఓసీ షేరు 2.60 శాతం జంప్‌తో రూ.173.35 వద్ద ముగిసింది. గ్లోబల్ టెన్షన్ తర్వాత, ముడి చమురు ధర బ్యారెల్‌కు 100 డాలర్లకు చేరుకుంటుందని చమురు రంగానికి సంబంధించిన నిపుణులు ఆందోళన వ్యక్తం చేశారు.

అయితే ఇది జరిగేలా కనిపించడం లేదు. ముడిచమురు ధరలు తగ్గుముఖం పట్టిన తర్వాత ధరల పెంపుదలపై తమపై ఎలాంటి ఒత్తిళ్లు ఉండకపోగా, మార్జిన్లు కూడా మెరుగవుతుండటం ప్రభుత్వ ఆయిల్ కంపెనీలకు ఊరటనిచ్చే అంశం. అదేవిధంగా, లోక్‌సభ ఎన్నికల తేదీల ప్రకటనకు ముందు ఈ కంపెనీలు పెట్రోల్ డీజిల్ ధరలను లీటరుకు 2 రూపాయల వరకు తగ్గించవలసి వచ్చింది.