రాష్ట్రాలకు నిర్మల గుడ్‌న్యూస్, రూ.12,000 కోట్ల వడ్డీలేని రుణం

కేంద్ర ఆర్థికమంత్రి నిర్మలా సీతారామన్ సోమవారం విలేకరుల సమావేశంలో మాట్లాడారు. ఈ రోజు సాయంత్రం నాలుగు గంటల నుండి ఆరు గంటల మధ్య జీఎస్టీ కౌన్సిల్ సమావేశం ఉంది. ఈ నేపథ్యంలో ఆమె ముందు మీడియాతో మాట్లాడారు. రాష్ట్రాలకు జీఎస్టీ నిధులకు సంబంధించి రెండు ఆప్షన్స్ ఇచ్చిన విషయం తెలిసిందే. తెలంగాణ సహా కాంగ్రెసేతర ప్రభుత్వాలు ఉన్న రాష్ట్రాలు రెండు ఆప్షన్‌లలో దేనినీ అంగీకరించడం లేదు. ఈ నేపథ్యంలో ఇటీవల జరిగిన జీఎస్టీ సమావేశం అసంపూర్ణంగా ముగిసింది. దీంతో రాష్ట్రాలకు జీఎస్టీ నిధులపై జీఎస్టీ కౌన్సిల్ భేటీ అవుతోంది.

మూలధన వ్యయం కోసం రాష్ట్రాలకు రూ.12,000 కోట్ల వడ్డీ లేని రుణాలను 50 సంవత్సరాల కోసం జారీ చేస్తున్నట్లు నిర్మల తెలిపారు. అదే సమయంలో వ్యవస్థలో డిమాండును పెంచేందుకు కూడా పలు చర్యలు ప్రకటించారు. ఆత్మనిర్భర్ ఫిస్కల్ డెఫిసిట్ ప్యాకేజీ కింద ఇస్తున్నట్లు తెలిపారు. రాష్ట్రాలకు ఇచ్చే ఈ మొత్తాన్ని మార్చి 31, 2021 లోపు ఖర్చు చేయాలన్నారు. 50 శాతం నిధులు ఇప్పుడు ఇస్తామని, మిగతా సగం నిధుల ఉపయోగం తర్వాత ఇస్తామని తెలిపారు.

ఇందులో రూ.200 కోట్ల చొప్పున 8 ఈశాన్య రాష్ట్రాలకు, రూ.450 కోట్ల చొప్పున ఉత్తరాఖండ్, హిమాచల్ ప్రదేశ్‌కు ఇవ్వనున్నట్లు తెలిపారు. రూ.7,500 కోట్లు మిగతా రాష్ట్రాలకు అందించనున్నారు. ఇందులో సగం చొప్పున ఇప్పుడే అందిస్తారు. మిగతా మొత్తాన్ని రాష్ట్రాలు ఖర్చు చేసిన అనంతరం ఇస్తారు.