Layoffs News: ఐదోసారి లేఆఫ్స్ ప్రకటించిన టెక్ కంపెనీ.. బ్యాడ్ న్యూస్‌తో కొత్త ఏడాది ప్రారంభం

Intel: కొత్త ఏడాది సమీపిస్తున్న తరుణంలో సాధారణంగా పలు కంపెనీలు ఉద్యోగులకు బహుమతులు, ప్రమోషన్లు ఇస్తుంటాయి. కానీ ఈ అమెరికన్ దిగ్గజ సంస్థ మాత్రం బ్యాడ్ న్యూస్ తో 2023ని ముగించాలని భావించింది. దీంతో సిబ్బందిలో తీవ్ర ఆందోళన నెలకొంది.

ప్రముఖ సెమీకండక్టర్ తయారీదారు ఇంటెల్ తన ఉద్యోగులకు ఐదోసారి షాక్ ఇచ్చింది. అమెరికాలోని ఫోల్సమ్‌లో ఉన్న పరిశోధన మరియు అభివృద్ధి సదుపాయం నుంంచి 235 మంది ఉద్యోగులను తొలగిస్తున్నట్లు ప్రకటించింది. ఈ మేరకు కంపెనీ రెగ్యులేటరీ ఫైలింగ్‌లో వెల్లడించింది.

ఈ ఏడాదికి సంబంధించి ఇంటెల్ ఐదవ రౌండ్ ఉద్యోగ కోతలు డిసెంబర్ 31న ప్రారంభమవుతాయని తెలుస్తోంది. ఇవి రెండు వారాల పాటు కొనసాగుతాయని కంపెనీ పేర్కొంది. 'సంస్థ వ్యాప్తంగా ఉన్న బిజినెస్ మరియు ఫంక్షన్ బేస్డ్ సిబ్బందిలో కొందరిని తొలగించాలని నిర్ణయించాం. తద్వారా ఖర్చులను తగ్గించుకుంటూ వృద్ధిని వేగవంతం చేయాలని భావిస్తున్నాం' అని ఇంటెల్ ఓ ప్రకటనలో తెలిపింంది.

గత 4 దఫాలుగా ఫోల్సమ్ క్యాంపస్ నుంచి ఇంటెల్ మొత్తం 549 మందికి ఉద్వాసన పలికింది. ఇక్కడి మొత్తం శ్రామిక శక్తిలో వీరు దాదాపు 10 శాతం కావడం గమనార్హం. సాలిడ్ స్టేట్ డ్రైవ్స్, గ్రాఫిక్ ప్రాసెసర్లు, సాఫ్ట్‌ వేర్ మరియు చిప్‌సెట్లకు సంబంధించిన R&D కార్యకలాపాలు ఇక్కడ జరుగుతూ ఉంటాయి. రానున్న రోజుల్లో క్లయింట్ కంప్యూటర్, డేటా సెంటర్ విభాగాల్లో 20 శాతం సిబ్బందిని వదిలించుకోవాలని చూస్తున్నట్లు నివేదికలు వెలువడుతున్నాయి.