Infosys: ఈ సారి టెక్కీలకు హైక్స్ లేనట్టేనా..? ఇన్ఫోసిస్ ఉద్యోగులకు తప్పని నిరాశ..

Infosys News: దేశంలోని రెండవ అతిపెద్ద ఐటి సేవల సంస్థ ఇన్ఫోసిస్ సీనియర్ మేనేజ్‌మెంట్ స్థాయి కంటే తక్కువ ఉద్యోగులకు సాధారణంగా ఏప్రిల్ నుంచి విడుదల చేసే జీతాల పెంపును వాయిదా వేసినట్లు వెల్లడైంది. కంపెనీలు ఎదుర్కొంటున్న పరిస్థితులకు ఇది అద్దం పడుతోంది.

జూన్ త్రైమాసికంలో వేతన పెంపులను అందుకోలేదని చాలా మంది ఇన్ఫోసిస్ ఉద్యోగులు వెల్లడించారు. ఆలస్యం లేదా వేతనాల పెంపుల గురించి యాజమాన్యం నుంచి ఎలాంటి సమాచారం లేదని వారు తెలిపారు. జూలైలో కంపెనీ తన సీనియర్ మేనేజ్‌మెంట్ కోసం వేతన పెంపులను ప్రకటించినప్పటికీ.. ఇప్పటిదాకా దీనిపై ఎలాంటి కమ్యూనికేషన్ లేదు.

ఇన్ఫోసిస్ గతంలో 2020 కరోనా మహమ్మారి సమయంలో నిధులను జాగ్రత్తగా నిర్వహించే క్రమంలో ఉద్యోగులకు వేతన పెంపులను నిలిపివేసింది. ఆ తర్వాత జనవరి 2021లో పెంపుదలలను తిరిగి ప్రారంభించింది. కానీ ప్రస్తుత ఆర్థిక పరిస్థితులు, డీల్స్ వెనక్కి వెళ్లటం వంటి పరిస్థితులు కంపెనీలను ఆందోళనలకు గురిచేస్తున్నాయి. జూలై 20న కంపెనీ తన మెుదటి త్రైమాసిక ఆర్థిక ఫలితాలను విడుదల చేయనుంది. IT మేజర్ FY24లో 4-7 శాతం ఆదాయ వృద్ధిని అంచనా వేస్తోంది.

మొత్తం డిమాండ్ వాతావరణం మారిపోయిందని చీఫ్ ఎగ్జిక్యూటివ్ ఆఫీసర్ సలీల్ పరేఖ్ గత నెలలో జరిగిన కంపెనీ వార్షిక సర్వసభ్య సమావేశంలో వెల్లడించారు. గత కొన్ని త్రైమాసికాలుగా అట్రిషన్ రేటు క్రమంగా తగ్గుతూ వస్తోంది.