నారాయణ మూర్తి చెప్తున్న 996 రూల్ ఏంటి? దీని గురించి ఎవరికీ తెలియని ఇంట్రెస్టింగ్ విషయాలు!

ప్రపంచవ్యాప్తంగా ఉద్యోగులు వర్క్-లైఫ్ బ్యాలెన్స్ గురించి చర్చిస్తున్న సమయంలో ఇన్ఫోసిస్ నారాయణ మూర్తి భారత యువత వారానికి 72 గంటలు పనిచేయాలని సూచించడం అలాగే రీసెంట్ గా చైనాలో ప్రసిద్ధి చెందిన 996 రూల్ ను ఉదాహరణగా చూపడం మరోసారి చర్చకు దారి తీసింది. అసలు 996 విధానం అంటే ఏంటి? ఇది ఎలా మొదలైంది? వంటి ఇంట్రెస్టింగ్ విషయాలు ఇప్పుడు చూద్దాం.

996 రూల్ అంటే..

996 రూల్ అనేది చైనాలోని టెక్ కంపెనీలు, స్టార్టప్‌ల కంపెనీలలో అనధికారికంగా అమలయ్యే ఒక కఠినమైన పని విధానం. 996 అంటే.. ఉదయం 9 గంటలకు పని మొదలుపెట్టి రాత్రి 9 గంటల వరకు పని చేయాలి. ఇలా వారంలో 6 రోజులు పని చేయాలి. ఈ మోడల్ ప్రకారం ఉద్యోగులు వారానికి దాదాపు 72 గంటలు (రోజుకు 12 గంటలు × 6 రోజులు) పనిచేయాల్సి ఉంటుంది.

ఇలా మొదలైంది

చైనాలో 2010 కాలంలో అలీబాబా, హువావే వంటి ఐటీ, ఇంటర్నెట్ కంపెనీలు వేగంగా వృద్ధి చెందుతున్నాయి. ఆ సమయంలో పోటీని తట్టుకోవడానికి కంపెనీలు త్వరగా లక్ష్యాలను చేరుకోవడానికి ఈ విధానాన్ని మొదలుపెట్టాయి. జాక్ మా వంటి కొంతమంది వ్యాపారవేత్తలు కూడా దీన్ని అప్పట్లో సమర్థించారు.

వివాదం ఎందుకు అయింది?

ప్రపంచవ్యాప్తంగా వర్క్ కల్చర్ లో 996 విధానం అత్యంత వివాదాస్పదంగా పరిగణించబడుతుంది. దీనికి ప్రధాన కారణాలు ఉద్యోగులపై ఉండే శారీరక, మానసిక ఒత్తిడి. వారానికి 72 గంటలు పనిచేయడం వల్ల ఉద్యోగులు తీవ్రమైన అలసట, ఆరోగ్యం దెబ్బతినడం వంటి సమస్యలను ఎదుర్కొంటారు. పనిచేస్తూనే కుప్పకూలిన సందర్భాలు కూడా గతంలో నమోదయ్యాయి.
మరొక ముఖ్యమైన కారణం తమ కుటుంబం, స్నేహితుల కోసం సమయం కేటాయించలేకపోవడం. ఈ పని విధానం వల్ల గతంలో చాలామంది పెద్ద నగరాలను విడిచి వెళ్లిపోయిన సంఘటనలు ఉన్నాయి. ఇకపోతే ఈ పని విధానం చైనా కార్మిక చట్టాలను పూర్తిగా ఉల్లంఘిస్తుంది. కంపెనీలు అనధికారంగా ఈ విధానాన్ని అమలు చేసేవి. అందుకే ఈ నియమం అప్పట్లో వివాదాస్పదం అయింది. ఈ విధానంపై ఉద్యోగుల నిరసనలు, ఆన్‌లైన్ ఉద్యమాల వంటివి పెరగడంతో చివరికి 2021లో చైనా అత్యున్నత న్యాయస్థానం 996 పని విధానాన్ని చట్టవిరుద్ధం అని ప్రకటించింది.

నారాయణ మూర్తి ఉద్దేశం ఏంటి?

ఇకపోతే ఇన్ఫోసిస్ నారాయణ మూర్తి గతంలో భారత యువత వారానికి 70 గంటలు పనిచేయాలని కోరినప్పుడు కూడా పెద్ద వివాదం జరిగింది. తాజాగా, ఆయన తన వ్యాఖ్యలను సమర్థించుకుంటూ చైనాలోని 996 ను ఉదాహరణగా చూపారు. అయితే భారతదేశం ప్రపంచంలోని అభివృద్ధి చెందిన దేశాలతో పోటీ పడాలంటే ప్రొడక్టివిటీ పెరగాలి అని చెప్పడం ఆయన ఉద్దేశం అని కొంతమంది అభిప్రాయపడుతున్నారు.